२३ वर्सांचो शॉन अचानक पावलो देवाघरांत.. सोडून आपले फामिलीक दुख्खाच्या सागरांत…

उजवाड ब्युरो : बुधवार, ११ नोव्हेंबरची सकाळ एकदम धक्को दिवपी आसली. शॉन झेवियर ह्या मुंबयच्या २३ वर्सांच्या तरणाट्याच्या अपघाती मरणाची खबर सगळ्या व्हॉट्सॅप ग्रुपांनी झळकली आनी मन सुन्न जाले.  पिंपळगाव, ता: भुदरगड हांगाचे फामाद शिक्षक सर्गेस्त  फर्नांडीस आनी वेंगुर्ला हांगाच्या मिशन हॉस्पिटलांत सेवेत आशिल्ली वेरोणिका फर्नांडीस हांची धूव डॉ सिमान अर्नॉल्ड झेवियर हिचो व्हडलो पूत शॉन हाच्या अचानक मरणान सबंद फर्नांडेस आनी झेवियर फामिलीचेर दुख्खाचो दोंगर कोसळ्ळा. शॉन हाचे फाटल्या चार दिसां आदीं एम.एस्सी. बरेभाशेन पास जाल्लो आनी ताचे कॉनवोकेशन जाल्ले. हैद्राबाद हांगा एका नामणेच्या कंपनींत तो मॅनेजर म्हुण पर्मनंट जाल्लो. ह्या पासोत सायबिणीक  धिनवास दिवंक तो आपले मोटारसायकलचेर वेलांकिणी गेल्लो.

वेलांकिणी सायबीणीचे दर्शन घेवन येताना जालो अपघात : वेरोणिका आपली धूव डॉ. सिमान, जांवय अर्नोल्ड आनी फामिली सांगाता वेलांकिणी सायबिणीचे दर्शन घेवन मंगळार, १० तारकेर मुंबय परत येतालीत. सगळी फामिली कार मदें तर शॉन आपल्या मोटार बायकाचेर आसलो. पूण वेलांकिन्नी- सेलम हायवेचेर बेंगळुर कडेन येता आसतना एका एसयुव्हीन ताका बायकाचेर जोराची धडक दिली आनी गाडी वयल्यान तो उडून हायवेचेर पडलो. तितल्यात फाटल्यान एक बस आयली आनी तो बसी सकेयल मेळ्ळो. बसचे चाक तकलीवयल्यान गेल्या कारणान ताचो सुवातीचेर अंत जालो. तकलीर हेल्मेट असून लेगीत कितें उपेग जालो ना.

विशेश म्हळ्यार ताच्या मोतासायकलींक कितेंच जाले ना, ताच्या हातांक-पायांक लेगीत कितें जाले ना ही अजापाची गजाल. शॉन बाबाची कूडीचेर बुधवारा दनपारा पोस्ट मॉर्टेम जाले, त्या उपरांत ती बेंगळूर हांगा व्हरतले आनी ब्रेस्तारा सकाळी ताची कूड कार्गो फ्लायटान मुंबय पावतेली. ब्रेस्तारा सांजेच्या दरम्यान होली फामील इगर्ज, चकाला हांगा ताचे इंतेर जातेले.

जग इतले अनिश्र्चीत जाला की आयज आमचे सांगाता जे कोण आसतीत ते फाल्या आसतलेच हाची खात्री ना जाल्या. धावपळीच्या आनी मोबायलच्या ह्या डिजीटल जगांत वेळेचे आनी मनीसपणाचे मोल उणे खूब उणे जाला. सायबिणीक धिनवास दिवंक गेल्ल्या तरणाट्याक अशे अपघाती मरण येवंचे, ही गजाल खूब दुख्ख दिणी आसा. देवाच्या मनांत नेमकें कितें आसले हेवुय आमच्या समजनीच्या पलतडीं आसा. जिवाच्या आकांतान हंबरडो फोडपी ताचे आवय-बापूय, ताची आजी वेरोणिका बाय आनी हेर सगळें हांचेर दुख्खाचो व्हडलो दोंगर कोसळ्ळा. ’ आतां हांव म्हज्या काळजाचेर कितलो व्हडलो फातर दवरुं? ’ दुख्खांत बुडून गेल्ली वेरोणिकाबाय हिची ही काळजाक हात घालपी साद मन सुन्न करता.

देव शॉनच्या आत्मयाक सासणाचो विशेव दिवं आनी ताच्या फामिलीक हे दुख्ख सहज करच्याक दिवं घटाय !!!

Related Posts

POPULAR NEWS

EDITOR'S PICK