घाटमाथ्यावयल्या स्थळांतरीत गोंयकारांचे हक्क अबाधित राखचे- पी.के.के.एस.चे डॉ.प्रमोद सावंत हांका निवेदन

 उजवाड ब्युरो, बेळगाव: पुणे कोंकणी क्रिस्टी सभा’- पुण्यांत स्थायीक जाल्ल्या गोंयच्या मूळ लोकांची संघटनेन गोंयांतल्या मूळ रावपी लोकांचे हक्क, खास करून *कमुनिदादस* (पारंपारीक गांव समाज संस्था) भितरले हक्क राखून दवरपाक गोंय सरकाराक उलो मारला. तशेंच ह्या व्यक्तींक गोंयचे हक्कदार, कायदेशीर रहिवासी म्हूण औपचारीक मान्यताय दिवची अशीय विनंती तांणी केल्या.

सभेच्या पदाधिकारींच्या शिश्टमंडळान शेनवारा-अखिल भारतीय कोंकणी परिशदेच्या अधिवेशनाच्या वेळार- मुख्यमंत्री डॉ.

गोंयचे मुख्यमंत्री डॉ.प्रमोद सावंत हांकां संबोधीत केल्ल्या निवेदनांत सभेन राज्या भायर स्थायीक जाल्ल्या गोंयकारांचे हक्क-खास करून गोंयच्या *कमुनिदादस* भितरले तांचे हितसंबंद आनी हक्क-दुळखून घेवचे न्हय अशी विनंती केल्या.

किरिस्तांव अल्पसंख्यांक समाजांतले वांगडी सयत जायते मूळ गोंयकार आपल्या मायभूंय गोंयांतल्यान अस्तंत घाटांभायर आशिल्ल्या प्रदेशांनी आनी देशांतल्या हेर वाठारांनी वेगवेगळ्या कारणांक लागून स्थलांतरीत जाले अशें सभेंत म्हळां. तरी लेगीत तांचे गोवा कडेन आशिल्ले भावनीक, संस्कृतीक आनी पूर्वजांचे संबंद आयज मेरेन अखंड उरल्यात.

स्थलांतराक लागून तांचो गोंयचो मोग उणो जावंक ना, तशेंच तांच्या तांच्या *कम्युनिडाडेस* वांगडी म्हूण तांचो कायदेशीर हक्क निवळावंक ना अशें सभेन भर दिलो. कोंकणी भास, परंपरा, सांस्कृतीक मुल्यां, आनी आपल्या पूर्वजां कडल्यान वारसा मेळिल्लें पुर्वजांचे दायज सांबाळून तिगून उरलां, तांच्या मायभूंय कडेन तांचें नातें घटमूट उरलां अशें तांणी नदरेक हाडलें. राज्या भायर रावपी गोंयकारांचे हक्क सुरक्षीत उरचे आनी तांकां तांच्या पुर्वजांच्या जमनीचेर कायदेशीर दावे वा त्या त्या *कम्युनिडाडेस* भितरल्या हक्काच्या हक्कां पासून वंचित दवरचे न्हय हे खातीर योग्य पावलां उबारपाचो संघटणेन मुख्यमंत्र्याक खर आवाहन केला.

मुख्यमंत्री गरजेचें मार्गदर्शन दितले आनी हे विशीं गरजेची कारवाय सुरू करतले असोय विस्वास निवेदनांत उक्तायला.

संघटनेचो अध्यक्ष एलियास बार्देस्कर (गोवेकार), उपाध्यक्ष सागर बार्देस्कर आनी आदलो अध्यक्ष पीटर डी’सोझा हांणी हें निवेदन मुख्यमंत्र्याक सादर केलें. स्थलांतरीत जाल्ल्या गोंयकारां संबंदीत परिस्थितीची सरकाराक खबर आसा, आनी हे संबंदी योग्य कारवाय करतले अशें मुख्यमंत्री डॉ.प्रमोद सावंत हांणी प्रतिनिधी मंडळाक आश्वासन दिलें.

मथळो: पुणे कोंकणी क्रिस्तांव सभेचो अध्यक्ष एलियास बर्देस्कर (गोवेकर), आदलो अध्यक्ष पीटर डी’सोझा आनी उपाध्यक्ष सागर बर्देस्कर मुख्यमंत्री डॉ.प्रमोद सावंत हांकां निवेदन भेटयतना.

Related Posts

POPULAR NEWS

EDITOR'S PICK