बेळगांव:. गदग जिल्ह्यातल्या गजेंद्रगड हांगाच्या होली फॅमिली स्कूलाच्या आवारांत पाद्रीचें निवासस्थान आनी ल्हान इगर्ज बांदपा विशींचो वाद राज्यांतल्या वरिश्ठ फुडारपणाच्या नदरेक पावला. बेळगावचे बिशप डेरेक फर्नांडीसान मुख्यमंत्री सिद्दारमैया, गृहमंत्री डॉ.जी.परमेश्वर आनी कायदो मंत्री एच. के पाटील हाचेकडेन सोमारा ह्या बाबतीत निवेदन दिवन कागाळ केली . आमदार आयव्हन डिसूझा, लुईस रॉड्रिग्स आनी फादर प्रमोद कुमार ताचे वांगडा आशिल्ले.
बिशप फर्नांडीसान आपल्या सविस्तर पत्रवेव्हारांत स्पश्ट केलें की होली फॅमिली शाळा 11 वर्सां आदीं बेळगाव डायोसीज शिक्षण मंडळा खाला आनी बेथानी सिस्टर्साच्या सहकारान स्थापन जाल्ली आनी हालींच पयली एसएसएलसी बॅच यशस्वीपणान चलयली. मुखेल शाळा डायोसीजीन चलयल्या, जाल्यार बालवाडी विभाग बेथानी सिस्टर्स चलयतात.
शाळे कडेन संबंदीत आशिल्ल्या पाद्री, शिक्षक आनी विद्यार्थ्यांच्या ल्हान कॅथलिक समाजाच्या धर्मीक गरजे खातीर रामापूर ग्राम पंचायतीच्या मर्यादे भितरल्या बिगर शेतकी निवासी जमनीचेर प्रेस्बिटेरी आनी ल्हान इगर्ज बांदपाची येवजण आशिल्ली. ग्रामपंचायतीन 10 मार्च 2025 दिसा दोनूय बांदकामांक परवानगी दिवपी थाराव संमत केल्लो आनी 24 जुलयाक अधिकृत परवानगीय दिली. ३० ऑक्टोबराक बांदकाम सुरू जालें आनी सुरवेचें बुन्यादीचें काम पुराय जालें.
पूण विश्व हिंदू परिशदे कडेन संबंदीत आशिल्ल्याचो दावो करपी पंगडान धर्मांतर कार्यावळीचो आरोप करून परवानगी रद्द करपाची मागणी करून ग्राम पंचायतीक पत्र सादर केल्ल्यान हो प्रकल्प अचकीत थांबयलो. बिशप फर्नांडीस हांणी हे आरोप खोटे आनी निराधार अशें म्हण खरपणान न्हयकारले.
गरजेच्यो सगळ्यो कायदेशीर प्रक्रिया पुराय करून लेगीत बीईओ आनी पीडीओन हस्तक्षेप करून हरकती उपरांत बांदकाम थांबवपाचो आदेश दिलो. क्रिस्तावांक “अन्यायपूर्वक लक्ष्य” करतात आनी थळाव्या अधिकाऱ्यांक परत परत विनंती केल्या उपरांत लेगीत कसलोच विसव मेळूंक ना अशें तांणी उक्तायलें.
आडमेळीं निर्माण करपी लोकां आड योग्य कारवाय करतले आनी शांतताय आनी कायद्याची योग्य प्रक्रिया सुनिश्चीत करपा खातीर हो प्रस्न प्राधान्यान सुटावो करतले अशें मुख्यमंत्री सिद्धारमैया आनी गृहमंत्री डॉ. जी परमेश्वर हाणी शिश्ट मंडळाक आश्वासन दिला.
फोटो: बिशप डेरेक फर्नांडीस, एमएलसी डी’सोजा, डॉ.परमेश्वर , लुईस रॉड्रिग्स आनी फादर प्रमोद कुमार — मुख्यमंत्री आनी गृहमंत्री हांकां निवेदन सादर केल्या उपरांत.











