भीषण अपघातांत बेळगाव जिल्ह्यांतल्या गुंजी गांवचो तरणाटो केव्हीन विन्सेट परेरा अंतरलो

उजवाड ब्युरो, बेळगाव: काळजांत थरकाप हाडपी एका दुर्दैवी घटनेंत बेळगाव जिल्ह्यांतल्या गुंजी गांवचो तरणाटो केव्हीन विन्सेट परेरा (32) हाका आयतार 27 दिसा सांजे एका भीषण अपघातांत मरण आयले. सर्गेस्त केव्हीन गोंयतल्या वेर्णा इंडस्ट्रीयल इस्टेटांत कामांक आसलो. सुत्रांनी दिलेल्या म्हायती परमाण केव्हीन आयतारा सांजे स च्या दरम्यान पणजीथावन मडगांव कडेन वयतालो. ह्या वेळार फादर आग्नेल आश्रम, पिलार लागी ताच्या मोटारसायकलीक एका खासगी बसची धडक बसली. ही धडक इतली जोरदार आसली की केव्हीनची मोटारसायकल हवेत उडून रस्त्यादेगेर पडली आनी मोटारसायकल वांगडा तोवुय पडलो. मोटार सायकल पडटकुच तिणे पेट घेतलो आनी त्या उज्यांत व्हरपळून केव्हीनाक मरण आयले. ताचे इंतेर संगरगाळी च्या सेंट इग्नेशस इगर्जींत सोमार सांजे 4.30 वरांचेर जातेले.
कालच केंद्रीय मंत्री नितीन गडकरी हाणीं गोंयचे मुख्यमंत्री डॉ. प्रमोद सावंत हांका गोयांत वाडपी अपघातांचो नियाळ घेवन ताचेर रोखडेच इलाज-उपाय करपाचो आदेश दिवपी पत्र धाडला. गोयांत अपघातांचे प्रमाण खूब वाडुंक लागला आनी हातुंत तरणाटे गतप्राण जावंक लागल्यात.
केव्हीनच्या फाटल्यान आवय-बापूय आनी तीन भाव असो परिवार आसा. ताचो एक भाव कॅजेटन परेरा हो गोयांत जेज्वीट ब्रदर आसा. ह्या घटनेन फकत गोयंतच न्हय, तर सबंद खानापूर तालुक्याचेर शोककळा पसरल्या. अपघातात कोणाची चूक आसली हाची वास्तपुस्त गोंय पुलीस करीत आसात.
तरणाट्यांक आवाहन : हाली नव्यो नव्यो मोटारसायकली जिवाची पर्वा करी नासताना वाऱ्याच्या वेगान चलयतात आनी तातुंत घात जाता. नोव्हेंबर 2 दिसा बेळगावचो एका तरणाटो फ्रान्सीस पेस हाच्या मोटार सायकलीचेर अपघाती मरणाची खबर ताजी आसतनाच आयज केव्हीनच्या मरणाची खबर आयल्या आनी पालकां मदें चिंता वाडल्या.

Related Posts

POPULAR NEWS

EDITOR'S PICK