
नंदगडच्या पवित्र कुरसाचेर डायोसिजन डे ऑफ रेपेरेशन खूब गंभीरतायेन मनयलो
उजवाड ब्युरो, बेळगाव: कोरेज्माच्या काळांत दर वर्सा जावपी बेळगांव डायोसिजीच्या पवित्र सुक्राराचे आचरण आयज नंदगडच्या दोंगरावयल्या पवित्र आनी अजापाच्या कुरसाच्या पायालागी जालें. दर वर्सा नवसरणीचो दीस म्हूण भावार्त्यांमदें लोकप्रीय आशिल्ल्या ह्या पवित्र दिसाच्या मुखेल कोंकणी मिसाचे मुखेल याज्ञिक म्हूण बेळगावचे आदले बिशप आनी बेंगळूरचे आर्चबिशप रेव्ह. डॉ. पीटर मच्याडो हाणीं मुखेल कोंकणी मीस भेटयले. हे मीस भेटोवंक बेळगावचे गवळीबाप रेव्ह. डॉ. डेरीक फर्नांडीस हांच्या सांगाता बेळगाव, गोंय आनी हेर दियोसिजींतल्या पाद्रींनी व्हड संख्येन सांगात दिलो. गोंय, कर्नाटक, महाराश्श्ट्रांतल्यान आयलेल्या भावार्त्यांनी व्हड संख्येन ह्या मिसांत वांतो घेतलो.

आपल्या शेर्मावात आर्चबिशप मच्याडो हाणीं पातक आनी भगसण्याचो नीज अर्थ सांगलो. देवालागी भगसणे मागप खूब सोपे आसा पूण एकमेकाडेन भगसणे मागप खूब कठीण आसता. आमी फकत आमच्या पातकां खातीरच न्हय, तर एकामेकाच्या पातकांचे भगसणे मागुंक एकटाय आयल्याव. सध्या खूब कठीण दीस सुरु आसात. इस्त्रायेल, इराण, अमेरिका आनी हेर देशांमदें म्हायुद्ध सुरु आसा, पूण ताचे परिणाम आमकां भोगचे पडटात. धार्मिक वडील, राजकी वडील हांचेपासोत आमी मागुंक जाय. जायते लोक ह्या युद्धाखातीर त्रासांत पडल्यात. म्हारगाय वाडत आसा. आमी वैयक्तीत पातकांचे भगसणे मागतात, कुमसारावेळार आमच्या पातकांची लिस्ट आमी सांगतात, पून आमी आमचे कर्तव्य करी नांव हे लेगीत एक पातकच.
आपल्या शेर्मावांत ताणीं मुखार म्हळे की जेजुन सांगल्या परमाणे तानेल्यांक, भुकेल्यांक, बंदखणींत आशिल्ल्यांक, अडचणींत आशिल्ल्यांमदे आमी देवाचे रूप पळोवंक जाय. तोच जेजु म्हूण आमी ताका मजत करुंक जाय. हे जर आमी करीना जाल्यार तेवुय एक पातकच आसा अशा उतरांनी ताणीं पातक आनी बऱ्या करण्यांचो नियाळ केलो.
आमच्या तशेच सगळ्यांच्या पातकांच्या भगसण्या खातीर आयज आमी देवालागी मागुया अशी विनंती लेगीत ताणी केली.

ह्या दिसाचो आरंभ दोंगराचेर जिव्या कुरसाच्या वाटेन जालो. त्या उपरांत इंग्लीश आनी कन्नड भाशांनी मिसाची भेटवण जाली. ह्या मिसांनी फादर नेल्सन पिंटो, फादर ज्युड फेलिक्स, फादर विजय मेंडीथ, फादर फिलिप कुट्टी, फादर प्रमोद कुमार, फादर ज्यो मंतेरो आनी हेर पाद्रींनी वांटो घेतलो. पॅरीश प्रीश्ट फादर शांतप्पा बोरकर आनी असिस्टंट पॅरीश प्रीश्ट फादर पीटर नासरेथ आनी फादर प्रशांत आनी नंदगड पॅरिशांतल्या भावार्त्यांनी कोरेज्मा काळांतल्या मिसांची आनी आराधनेची बरी तयारी केल्ली.
सकाळी 8 वरांथावन दीसभार सुरु आशिल्ल्या ह्या पवित्र दिसा खातीर सांजे 7 वरांमेरेन भावार्यांचे लोंढे सुरुच आसले.
News Views: 255








