बेळगांवच्या लूर्डस हायस्कुलान पयल्या सीबीएसई बॅचांत शंबर टक्के यश मेळयलें


मिनीन गोन्साल्वीस, उजवाड ब्युरो :
नामनेचे सामाजिक वावराडी आनी उद्योजक तसेच प्लॅनेट हायड्रॉलिक्स ह्या नामणेच्या कंपनीचे संस्थापक आंतोंन डिसोझा आनी फामिल संचालीत लूर्डस हायस्कूल (सीबीएसई) , पीरनवाडी ह्या इस्कोलान 2025-26 शिक्षणीक वर्सा खातीर सीबीएसई धावी मंडळ परिक्षेंत शंबर टक्के रिजल्ट मेळोवन एक उल्लेखनीय मार्गदर्शक आदर्श निर्माण केला. एका कोंकणी अभिमानी फामिलीन मेळयिल्ले हे यश खूब वाखाण्णी करपा सारकें आसा.
धाव्या वर्गांतल्या विद्यार्थ्यांच्या पयल्या बॅचचे हे यश ह्या संस्थे खातीर एक अभिमानाची गजाल आसा.
वेवस्थापन, कर्मचारी, विद्यार्थी आनी पालकांनी ह्या उत्कृश्ट कामगिरीचेर खोस आनी समाधान उक्तायलें. शाळेन ह्या यशाचें कारण आपल्या शिक्षकांच्या समर्पणाक, विद्यार्थ्यांच्या कश्टाक आनी पालकांच्या सतत आदाराक लागून आसा अशें सांगलें.
पयल्या क्रमांकार दयानंद सनदी हाणें 93.5%, पद्मिनी पत्रा 92.16%, आनी प्रगति पार्शेकर हिणें 87.5% गूण मेळयले. हेर विद्यार्थ्यांनीय तोखणायेची कामगिरी केली, तातूंत संस्थेन सांबाळिल्ल्या सुसंगत शिक्षणीक मानकांचें प्रतिबिंब दिसून आयलें.
संस्थापक आनी मुखेल शिक्षणीक संचालक श्रीमती क्लारा डिसोझा आनी सहसंस्थापक आनी अध्यक्ष श्री आंतोन डिसोझा हांचे मार्गदर्शन, दृश्टीकोन आनी फुडारपणाक लागून संस्थेन हे यश मेळयला. शाळा प्राचार्य रेचल डिसोजाच्या सक्षम प्रशासना खाला शाळेची खुब प्रगती जाल्या.
इस्कोलाचे संचालक जॉन्सन फर्नांडीस, रोझारियो कुटीन्हो आनी डॉ. क्लिंटन डिसोझा हांणीय संस्थेच्या वाडीक आदार दिवपाक आनी विद्यार्थ्यां खातीर समग्र शिकपाचें वातावरण सुनिश्चीत करपाक म्हत्वाची भुमिका साकारली.
शाळा वेवस्थापनान शिक्षक आनी बिगर शिक्षक कर्मचाऱ्यांचे अथक यत्न आनी वचनबद्धते खातीर काळजा थावन उपकार मानल्यात तशेंच पालकांनी दिल्ल्या विस्वास आनी सहकाराची खाशेली तोखणाय केल्या. आंतोन आनी क्लारा डिसोझा फामिलीचें उजवाड परिवार अभिनंदन करता आनी तांच्या फुडल्या वाटचालीक लेगीत शुभेत्सा दिता.

Related Posts

POPULAR NEWS

EDITOR'S PICK