गोंयच्या सायबा विरुद्ध खट्टरच्या दर्पोक्तीचेर गोंयां सयत घांटमाथो प्रदेशांमदें खर निशेध

उजवाड ब्युरो, बेळगांव :  सांत फ्रान्सीस शावेर अर्थात गोंयचो गोंयचो सायब ह्या नांवान भावार्त्यांमदें फामाद आशिल्ल्या गोंयच्या पात्रोण सांताच्या नावाची बदनामी करपी वक्तव्या केलेलो कर्मठ हिंदुत्ववादी गौतम खट्टर हाचे विरुद्ध सबंध गोंयांत आनी घांटमाथो प्रदेशांतल्या भावार्त्यांमदें संतापाची लाट उसळ्ळ्या. 18 तारखेर वास्को हांगा जाल्ल्या एका जाईर कार्य्कक्रमात खट्टरान सांत फ्रान्सीस शावेर हो एक आतंकवादी आसलो आनी ताच्या कुडीक किडे पडल्यात अशा अपमानास्पद उत्रांनी दर्पोक्ती केल्ली. ताचे पडसाद जशें गोंयांत तशेच ते घांटमाथो आनी दक्षीण महाराष्ट्रांतल्या कांय भागांत उमटल्यात. गोंयच्या सायबाच्या सगळ्या भक्तांनी ताच्या ह्या वक्तव्याचो खर निशेध केला.बिशप्स, पाद्री आनी गोंयच्या सायबाच्या सगळ्या पाटलावदारामदें ताच्या ह्या वक्तव्याचो खर निशेध सुरु जाला. धर्मीक फुडारी, सामान्य प्रतिनिधी आनी समुदायाच्या वांगड्यांनी खटट्टीरच्या वक्तव्याचेर खर दुख्ख उक्तायलां, खट्टराचेर बेगोबेग कारवाय करपाची मागणी जायत आसा. दुसरे वटेन संबंधीत प्राधिकरणान, सरकारान, पुलीस प्रशासनान जातीय समाजीक एकचार राखपाचो उलो मारला आनी दिसांदीस गोयांत वाडीक लागिल्ल्या धार्मिक कट्टरवादाचेर आळो  घालपा खातीर सरकारान वावर करचो असो उलो मारला.
आर्चबिश्प पीटर मच्याडो : बेंगळूरचे आर्चबिस्प डॉ. पीटर मच्याडो हाणीं लेगीत खूब खर उत्रांनी खटट्टरच्या विधानाचो निशेद करून गोयांत शांती आनी बंधुभाव सदाकाल रावचो म्हूण प्रार्थना केल्या. गोंयच्या सगळ्या धर्मांच्या भावार्त्यांक सांत फ्रान्सीस शावेराचे माहत्म्य खबर आसा. पूण खट्टर सारके जातीवादीं गोंयची प्रतिमा म्हेळयपाचो प्रयत्न करतात. भावार्त्यांनी संयम बाळगून गोंयची शांतताय आनी अस्मिताय सांबाळची अशी ताणीं विनंती केल्या.
बिशप डेरीक फर्नांडीस : निशेद करप्यां मदें सगळ्यां मुखार आशिल्ले बेळगांवचे बिशप डेरीक फर्नांडीस हांणी खट्टरच्या विधानाचो खर निशेध केला. ताचे विशीं उलयतना ताणीं खट्टरचे विधान सामको आक्षेपार्ह, नैतीक नदरेन अस्वीकारार्ह आनी लाखांनी लोकांच्या भावनांक दुखावपी आसा अशें म्हणलां. ” सांत फ्रान्सीस शावेर फकत क्रिस्तांव लोकांनीच न्हय तर सगळ्या समाजांमदें मानाचे स्थान आशिल्लो सांत आसलो. आयज लेगीत गोंयचो सायब धर्मीक शिमो हुंपून करुणा, सेवा आनी एकचाराचो दायज दाखयता. पूण खट्टराच्या बेजबाबदार विधानांक लागून भावार्त्यांमदें आनी सगळ्या योग्य विचारांच्या व्यक्तींक खोल धपको बसला, ” अशें बिशप डेरीक हांणी  सांगलें.
” बापा तांकां भगस, कित्याक तो कितें म्हणटा तें ताकाच खबर ना, ”  ह्या जेजुच्या उतरांनी बिशप फर्नांडीस हाणी ताचेखातीर भगसणे मागला. जेजुची हीं उतरां आमकां दुस्वासान न्हय, तर प्रार्थना आनी विवेकाक उलो मारून जाप दिवपाक मार्गदर्शन करतात,” अशें सांगून ताणें फुडें म्हणलें की, खट्टरान केल्ली ही टिप्पणी संताच्या चिरंतन दायजाची समज नाशिल्ल्यान निर्माण जाल्या.
फादर नेल्सन पिंटो :अशेच तरेची भावना उक्तायतना ज्येश्ठ पाद्री फादर नेल्सन पिंटो हांणी उलोवन दाखयली. खंयच्याय समाजाक जे पवीत्र आसा ताचो आदर करप हें सुसंस्कृत समाजाचें मुळावें तत्व आसा. ” भौशीक माचयेचो केन्नाच गैरवापर करून धर्मीक भावना दुखोवंक जायना वा फूट घालपाक जायना. ताचे बदला तांणी एकचार आनी एकामेकांचो आदर वाडोवंक जाय, ” अशें सांगून आक्षेपार्ह टिप्पण्यांचो निशेध करपाक आपूण ह्या वाठारांतल्या निश्ठावान लोकां वांगडा एकवटान उबो रावलां, अशें तांणी सांगलें.
बेळगांव जनसंपर्क कार्यालय : बेळगांव डायोसीजच्या जनसंपर्क कार्यालयान लेगीत खर निवेदन जारी करून ही टिप्पणी “सोसूं नजं” अशें म्हणलां आनी अधिकाऱ्यां कडल्यान गंभीर प्रतिसाद मेळूक नाशिल्ल्यान प्रस्नचिन्न उबें केलें. हेर धर्मांच्या फुडाऱ्यांक उद्देशून केल्ल्या अशेच तरेच्या टिप्पण्यांक अशीच उदासीनताय मेळटली कितें  अशे म्हणून खट्टरच्या विधानाचेर हुस्को उक्तायलो आनी अशा वक्तृत्वाच्या सामान्यीकरणा आड शिटकावणी दिली.
फादर प्रमोद कुमार : जापसालदारकीन उलोवपाची मागणी करतना फादर प्रमोद कुमार हांचे सयत पाद्री आनी वांगड्यांनी खट्टर हांकां आत्मपरिक्षण करून माफी मागपाचो उलो मारलो. ” देव, आपल्या दयेन, पश्चात्ताप करपी काळजाक भगसता. पूण जर अशी वृत्ती कायम उरली जाल्यार हे समाजाच्या एकचाराचे दिश्टीन घातक आसल्याचे ताणीं म्हळा.
फादर ज्यो मंतेरो : बेळगांव दियोसिजीचे धार्मिकांचे एपिस्कोपल विगार फादर जो मोंतेरो हांणी लेगीत खर उत्रांनी निशेद केला. खट्टरची ही टिप्पणी गोंयच्या धर्मनिरपेक्ष संरचनेक कलंकीत करपाचो यत्न अशें म्हणला आनी फुटीरतावादी विचारधारेआड शिटकावणी दिली. परत परत चिथावणी दिवन गोंयची शांतताय आनी सुसंवाद विस्कळीत जावचो न्हय अशें तांणी सांगलें.
सामान्य फुडाऱ्यांनीय खर आक्षेप घेतला. बेळगांवच्या जेरोम आंद्राद हांणी ह्या वक्तव्याचें वर्णन जातीय आनी द्वेषपूर्ण अशें केलें आनी अशी विधानां ह्या वाठारांतली समाजीक समरसता इबाडपा खातीर आशिल्ल्याचो आरोप केलो. सांत फ्रान्सीस शावेराच्या कुडीच्या दर्श्नाखातीर दर वर्सा गोंयांत येवपी हजारांनी लोकांच्या खोल भक्तीचेर तांणी उजवाड घालो, अशे तरेच्यो टिप्पण्यो श्रद्धा आनी समान दायज ह्या दोगांचोय अपमान करतात अशें नमूद केलें.
महाराष्ट्रांतले भाजपाचे ज्येश्ठ फुडारी देवराज बार्देसकार हांणीय ह्या वक्तव्याचो निशेध केलो आनी राज्य आनी राष्ट्रीय पांवड्यार कारवाय करपाचो उलो मारलो. धर्मांमदीं परस्पर आदराचें म्हत्व तांणी उक्तायलें आनी प्रमोद सावंत हांणी हैं प्रकरण गंभीरतायेन घेवचें अशें आवाहन केलें. बार्देसकारान फुडें जातीय सलोखा राखपा खातीर द्वेषपूर्ण उलोवपा आड मोहीम सुरू करपाची येवजण जाहीर केली.

Related Posts

POPULAR NEWS

EDITOR'S PICK