समाजीक समरसताये खातीर अल्पसंख्यांक फुडाऱ्यानी पोलिसांक सहकार दिवचो: पुलीस आयुक्त बोर्स

उजवाड ब्युरो, बेळगाव:  5 मे: समाजाच्या सर्वांगीण बरेपणाक लागून सोशल मिडियाचो गैरवापर, ड्रग्साचो दुरुपयोग, जुगार, आनी ल्हान ल्हान गुन्यांवांच्या वाडट्या प्रभावा सामाजिक बंधुभाव वाडोवपाक आनी जागृताय निर्माण करपाक अल्पसंख्यांक समाज फुडाऱ्यांक पुलीस आयुक्त भूषण बोरसे हांणी आवाहन केलां.

प्रधानमंत्र्याच्या अल्पसंख्यांकांक समाजाखातीर 15 पॉइंट्स कार्यावळीची अंमलबजावणी करपा खातीर स्थापन केल्ल्या जिल्लो अल्पसंख्यांक समितीच्या राज्य सरकारान नामांकीत केल्ल्या वांगड्यां सांगता जालेले बसकेंत ते उलयताले. मंगळारा सकाळीं आयुक्त कार्यालयांत ही बसका जाली.

तरणाट्या पिळगे विशीं, खास करून जेन झॅड विशीं हुस्को उक्तायतना आयुक्त बोरसे हांणी तरणाट्यांक जबाबदार नागरीकत्वाचे दिकेन मार्गदर्शन करपा खातीर सामुहीक यत्न करपाची गरज आसा हाचेर भर दिलो.

समाजाचो फुडार एक तर करपाक वा मोडपाक शकता अशा जेन झॅड म्हणून वळखून घेतिल्ल्या तरणाट्यांचो म्हाका खोलायेन हुस्को आसा, आमी हात जोडून ह्या तरणाट्यां मदीं एक बरो समाज उबारपा खातीर जागृताय निर्माण करपाक वावुरया अशें तांणी सांगलें.

तशेंच ड्रग्साचो दुरुपयोग, जुगार, आनी हेर समाजीक वायटपणाचेर आळाबंदा हाडपा खातीर शारांतल्या पुलिसांनी घेतिल्ल्या वेगवेगळ्या उपक्रमांची म्हायती पुलीस आयुक्तान वांगड्यांक दिली. जागृताय मोहिमांनी आनी समाजीक प्रसार कार्यावळींनी सक्रीयपणान वांटो घेवपाक अल्पसंख्यांक फुडाऱ्यांक आनी समाज प्रतिनिधींक तांणी विनंती केली.

लुईस रॉड्रिगीस, नियाज सौदागर, शाहिद मेमोन , किल्लेदार आनी परमिंदर भाटिया हांचो आस्पाव सरकारान नामांकीत केल्ले समितीचे वांगडी हे बसकेंत हाजीर आशिल्ले.

पुलीस उपायुक्त एन व्ही बरमणी आनी जिल्लो अल्पसंख्यांक अधिकारी विजय प्रकाश पुजेर हांणीय हाजीर रावून आपल्या प्रशासकीय अणभवाचेर आदारीत मोलादीक सुचोवण्यो सांगल्यो.

चर्चा केल्ल्या मुखेल सुचोवण्यां मदीं मोहल्ला समित्यो तयार करप, शाळा आनी म्हाविद्यालयांनी जागृताय कार्यावळी घडोवन हाडप, आनी मुसलमान, क्रिस्तांव, जैन, शीखलीगार आनी हेर अल्पसंख्यांक समाजा संबंदीत प्रस्नांचेर उपाय काडप, तशेंच शाराच्या समाजीक वातावरणा संबंदीत व्यापक हुस्क्याचो आस्पाव आशिल्लो.

Related Posts

POPULAR NEWS

EDITOR'S PICK