
उजवाड ब्युरो, बेळगांव: नागरी सेवा ही फकत प्रतिश्ठे खातीर वा आकर्शणा खातीर वेंचून काडपाची करिअर न्हय तर समाजांतल्या दुबळ्या, वंचित आनी गरजेवंत वर्गांची सेवा करपाचें एक प्रभावी माध्यम. समाजाची वास्तवताय समजून घेवप आनी संवेदनशील अधिकारी जावपाचो हेतू दवरचो अशें आवाहन बेळगांव जिल्लो परिशदेचे मुखेल कार्यकारी अधिकारी राहुल शिंदे हांणी केलें.
हांगाच्या सेंट पॉल हायस्कुलांत स्थापन जाल्ल्या आयएएस-आयपीएस क्लबाच्या उक्तावण सुवाळ्यांत ते उलयताले. सध्या आपलें 170वें स्थापणूक वर्स मनयपी हे नामनेचे शिक्षणीक संस्थेन विद्यार्थ्यांक ल्हान पिराये सावन नागरी सेवे कडेन प्रेरणा दिवपाच्या हेतान हो उपक्रम सुरू केला.
“कॅच देम यंग” ह्या उपक्रमांतल्यान स्थापन जाल्ल्या ह्या क्लबाची संकल्पना प्राचार्य फादर एरीक मॅथायस हांची आसा. नागरी सेवे खातीर विद्यार्थ्यांक मार्गदर्शन, प्रेरणा आनी योग्य दिका दिवपाची आसा. ह्या उपक्रमाची तोखणाय करतना शिंदे हांणी सांगलें, जिल्लो प्रशासन आनी जिला परिशदेच्या समन्वयान जिल्ह्याच्या दरेका तालुक्यांत अशेच तरेचे उपक्रम चालीक लावपाची येवजण आसा.
नागरी सेवेंत प्रवेश मेळोवपा खातीर पदवी शिक्षणाचो विशिश्ट फांटो वेंचपाची गरज ना, म्हत्वाचें म्हणल्यार तुमी वेंचून काडिल्ल्या विशयांचें खोलायेन गिन्यान मेळोवप, तुमच्या ध्येयां विशीं स्पश्टपणान रावप आनी शाळेंत आनी कॉलेजीच्या शिक्षणांत उत्कृश्ट कामगिरी करप अशें तांणी सांगलें.
विद्यार्थ्यांनी फकत पुस्तकांपुरती मर्यादीत उरूंक फावना पूण समाजांतली उदरगत, उदरगत कामां आनी सामान्य लोकांची समस्या समजून घेवपाचो यत्न करचो. तशेंच जिल्ह्यांतल्या वरिश्ठ अधिकाऱ्यांच्या आनी प्रशासकीय यंत्रणेच्या कामाचेय बारीकसाणेन नदर दवरची असो उलो तांणी मारला.
शिंदे हांणी आपल्या प्रशासकीय प्रवासांत आपले स्वताचे अणभव सांगून विद्यार्थ्यांक मार्गदर्शन केलें. तशेंच विद्यार्थ्यांच्या वेगवेगळ्या प्रस्नांक जाप दिवन तांकां नागरी सेवेचे दिकेन वचपाक प्रेरणा दिली. ह्या संदर्भार उलयतना फादर एरिक हाणी सांगले की सेंट पॉल हायस्कुलांत आतां मेरेन सुमार धा वरिश्ठ प्रशासकीय अधिकारी तयार जाल्यात . चरित्र, तांक आनी विवेक ह्या तीन मुल्यांचें म्हत्व रेखांकित करून तांणी विद्यार्थ्यांक आपल्या पालकांक मजत करची, जिज्ञासू आनी निरिक्षक आसचें अशें सांगलें. फुडाराक भारताचें फुडारपण करपा खातीर गरजेचे गूण आत्मसात करपाचो सल्लो तांणी दिलो.
ह्या कार्याक्रमाचें उक्तावण व्हाईस प्रिन्सिपल फादर. आलेंड्रो डाकोस्ता, जिल्लो अल्पसंख्यांक समितीचो वांगडी आनी वरिश्ठ पत्रकार लुईस रॉड्रिगीस, क्लब समन्वयक साविओ मार्टीन्स, शिक्षक कर्मचारी आनी सव्या ते धाव्या वर्गांतले सुमार शंबर विद्यार्थी हाजीर आशिल्ले.
फोटो : 1
सेंट पॉल हायस्कुलांत आयएएस-आयपीएस क्लबाच्या उक्तावण सुवाळ्यांत दिवो पेटयतना जिला परिशदेचो सीईओ राहुल शिंदे. हाचे वांगडा फादर एस. एरिक मॅथेस, फादर हांणी केला. आलेझांड्रो डाकोस्ता, लुईस रॉड्रिगीस आनी हेर मानेस्त.
आयएएस-आयपीएस क्लबाच्या उक्तावण उपरांत राहुल शिंदे वांगडा सेंट पॉल हायस्कुलाच्या नागरी सेवेची तयारी करपी विद्यार्थी.









