उत्तुरच्यो पोरी..चऽऽऽड भारीऽऽऽ…

उजवाड ब्युरो, बेळगाव: सुमार दोनशीं वर्सां आदीं मुळावे गोंयाथावन येवन आजरा तालुक्यातल्या उत्तुर गावांत राबितो केल्ल्या कोंकणी क्रिस्तावांच्या सद्याच्या पिळगींतल्या धुवांनी यशाची उंचाय गाठल्या. ह्या गावांतल्या बारदेस्कर (क्रुझ)) आनी रॉड्रीग्स घराण्यांतल्यो एक न्हय-दोन न्हय तर पांच धुवो दोतोर जाल्यात. ह्या पांच मदल्या दोगींनी एम.डी. पदवी यशस्वी रितीन मेळयल्या, एकली एम.डी. करता, एकटीन एम.बी.बी.एस. पदवी मेळयल्या तर आनींक एकली एम.बी.बी.एस. पदवी मेळयच्या मार्गार आसा. एका ल्हानशा गावांतली पांच पांच चेडवां यश दोतोर जावप म्हळ्यार ही खूब अभिमानाची आनी अभिनंदनीय गजाल आसा.
कोल्हापुर जिल्ह्यांतल्या घांटमाथो प्रदेशांतल्या आजरा तालुक्यांतले उत्तुर गाव हें पोटतालुक्याचे शार वजा गाव. आजरा-कोल्हापुर मार्गार आजऱ्याथावन सादाराण 20 कि.मी. आनी गडहिंग्लजथावन सादारण 15 कि.मी. अंतराचेर आशिल्ले हे गाव म्हळ्यार कोल्हापुर-आजरा- भुदरगड आनी कागल अशा चार तालुक्यांक जोडपी एक जंक्शन आसा. हांगा कोंकणी क्रिस्तावांची मेजकीच चार घरां. डिक्रुझ (बारदेस्कर) आनी हुड्याथावन स्थळांतरीत जाल्ले संतान आनी सुशा लुद्रीक (रॉड्रीग्स) हे शिक्षक जोडपें. अशा ह्या कुटुंबांतली आदली पिळगी शिक्षकांची आसली. जातुंत हांगाचे  सर्गेस्त फास्कु फिलिप उर्फ एफ.एफ. बारदेस्कर, शाहु बाबु बारदेस्कर उर्फ प्रभुधरांचे गाडीवान मामा हांचो आस्पाव आसा. हांगाच्या शांताबाय, कोसुबाय तसेच कार्मुबाय हांणी ल्हान व्हड कामा करुन तसेच माथ्यार सुक्या नुस्त्याचो पांटुलो घेवन पायपीट करत आजुबाजुच्या खेड्यापाड्यांनी वेपार केलो आनी आपल्या फाामिलिक आर्थिक आधार दिलो. चार दशकां आदीं हांगाच्या समाजाची परिस्थिती खूब गरिबीची आसली. ह्या सगळ्यां मदें शेतकरी आशिल्ले सर्गेस्त एफ.एफ. सरांचे आवय-बापूय सर्गेस्त फिलीप आनी सेलेस्तीन बारदेस्कर हांचेय नाव व्हड सन्मानान घेवचे पडटले.
आताच्या पिळगींतले सर्गेस्त इनास बारदेस्कर हांणी सांगलीत मुख्याद्यापक म्हुण सेवा केली. शांप्रास बारदेस्कर (उद्योजक), ऑगस्टीन बारदेस्कर (इंजिनियर), आशिश बारदेस्कर(उद्योजक), शाम लुद्रीक (व्हेट. दोतोर) हांणी आपल्या आपल्या क्षेत्रांत यश मेळोवन आपल्या वाडवडलांच्या कश्टाचे चीज केले आनी गावचे तसेच समाजाचे नांव पर्जळीत केले. ह्या जैतीवंत परंपरेक आता पंचतारांकीत अशे यश लाभला. उत्तुर गांवच्या पांच चेडवांनी दोतोर जावन आपल्या समाजाचे आनी गांवचे नांव अधिक पर्जळीत केला तर एक धूव फिल्म क्षेत्रांत चमकता.
उत्तुरच्या धुवांचे उत्तुंग यश : सध्या नवी मुंबय हांगा राबितो केल्ले आगोस्तीन आनी आर्कांजेला बारदेस्कर हांची व्हडली धूव डॉ. रेबेका बारदेस्कर हिणे एम.डी. स्कीन आनी व्हिडीआरएल स्पेशालिस्ट म्हुण हालीच यश मेळयला. ACPM Medical College, Dhule, Maharashtra University of Health Sciences Nasik हांगाथावन तिणे ही पदवी फर्स्ट क्लास घेवन मेळयली. तसेच मुळावे उत्तुर आनी सद्या सांगली राबितो केल्ल्या क्लेरा आनी सर्गेस्त इनास बारदेस्कर हांची एकलीच धूव आशिल्ल्या डॉ. जॉयसी बारदेस्कर,एम.डी. कम्युनिटी मेडिसिन, हिणे ही पदवी मुंबयच्या फामाद ग्रांट्स मेडिकल कॉलेजांतल्यान मेळयल्या. हांचेच पावलार पावल मारून डॉ. शाम बारदेस्कर हांची धूव डॉ युनीस ही सुद्धा एम.डी. ॲनेस्थेसियाचे दुसऱ्या वर्सांत मिरज मेडिकल कॉलेजींत शिकप घेता. आपल्या ह्या भयणींचो आदर्श घेत कोल्हापूर हांगाचे उद्योजक शांप्रास आनी मनीषा बारदेसस्कर हांच्यो दोन धुवो दोतोर जातल्यो. व्हडली  ग्लोरिया हिणे बेंगळुरच्या फामाद सेंट जॉन्स मेडिकल कॉलेजींतल्यान एम.बी.बी.एस. पदवी मेळोवन सद्या पांचगणी हांगाच्या बेल एअर रेड क्रॉस हॉस्पीटल, पांचगणी हांगा इंटर्नशीप करुन रोखडेच एम.डी. पासोत दाखलो घेतली. तिचीच धाकटी भयण कॅरल ही आता बेंगळुरच्या सेंट जॉन मेडिकल कॉलेजींत दुसरे वर्स एम.बी.बी.एस. करता.
उत्तुर गांवचे उत्तुंग नांव : अगदी काल मेरेन उत्तुर गांवाबद्दल कोणांक चडशी म्हायती नासली, अधिक करुन सबंद घांटमाथो आनी सरभोंवतणीच्या प्रदेशांत. कित्याक म्हळ्यार हांगा ना कपेल, ना पाद्री-माद्रींचो वावर. पूण उत्तुरच्या समाजांतल्या फाटल्या दोन पिळग्यांनी संघर्शपूर्ण परिस्थितीतल्यान मुखार येवन आपल्या वाडवडलांच्या कश्टांची जाणवाय दवरुन आयज घवघवीत यश मेळयला. उत्तुर गांवच्या ह्या सगळ्या धुवांनी तर मळबा इतले यश मेळयला आनी आपल्या उत्तुरचे नांव सगळेकडेन पावयला. तर ह्याच गांवची धूव मिलन सेबेस्तियान डिसोझा हिणे बॉलिवुडांत पदार्पण केला. वेगवेगळ्या टि.व्ही सिरियलांनी ती म्हत्वाच्यो भुमिका निभयता.
समेस्त उत्तुरकर कोंकणी क्रिस्तांव समाज आनी ह्या सगळ्या धुवांचे जितले अभिनंदन करप तितलेच उणे हा ! 
– लुईस रॉड्रीग्स, luirods@yahoo.com

Related Posts

POPULAR NEWS

EDITOR'S PICK