काळजाच्या उपचारांत ‘अरिहंत’ची इतिहासीक कामगिरी

उत्तर कर्नाटकांतली पयली टीपीव्हीआर प्रक्रिया येसस्वी

  • फकत तीन दिसां भितर दुयेंतीक डिस्चार्ज
  • हॉस्पिटलाचे कामगिरीचें केलें कवतूक

उजवाड ब्युरो, बेळगांव : काळजा दुर्येसाच्या उपचार क्षेत्रांत अरिहंत हॉस्पिटलान म्हत्वपूर्ण कामगिरी केल्या. उत्तर कर्नाटकांतली पयली ट्रान्सकॅथेटर पल्मोनरी व्हॉल्व्ह रिप्लेसमेंट (टीपीव्हीआर) प्रक्रिया येसस्वीपणान जाली. हे आधुनीक उपचार पद्दतींत कसलीच चिरफाड करिनासतना पांयांतले रक्तवाहिनींतल्यान कॅथेटराच्या आदारान काळजाची झडप बदल्ली. ताका लागून अरिहंत हॉस्पिटलाच्या माध्यमांतल्यान दुर्येर्तीक परत मोटे शस्त्रक्रियेक तोंड दिवपा बदला उणे चिरफार्डीतल्यान उपचार घेवपाचो पर्याय उपलब्ध जाला.

महाराष्ट्रांतल्या सांगली हांगाच्या 23 वर्साच्या तरणाट्याचेर ही प्रक्रिया केली. ताचेर ल्हानपणांत दोन फावटी ओपन हार्ट सर्जरी जाल्ली. मात तिसरे फावटी अरिहंत हॉस्पिटलांत छाती उगडिनासतना झडप प्रत्यारोपण केलें उपचारा उपरांत दुर्येतीची भलायकी समाधानकारक उरली. विशेश म्हणल्यार फकत तीन दिसांत दुर्येतीक घरा धाडलो.

काळजांतल्यान फुफुसां कडेन रक्तप्रवाह नियंत्रीत करपी पल्मोनरी व्हॉल्व्ह अशीर जाल्यार वा तिच्यांतल्यान रगताची गळटी जाल्यार काळजाचेर ताण पडटा. ताका लागून खरस मारप वा शारिरीक तांक उणी जावप अश्यो समस्या निर्माण जातात. ट्रान्सकॅथेटर पद्दतींत रक्तवाहिनींतल्यान कॅथेटर व्हरून झडप बसयली. योग्य दुर्येतींत हे प्रक्रियेक लागून परत ओपन हार्ट सर्जरी टाळू येता.

बालहृदयरोगतज्ञ डॉ. गोविंद औरादकर हांणी प्रक्रियेच्या नियोजना पासून प्रत्यक्ष अंमलबजावणे मेरेन म्हत्वाची भुमिका केली. सीटी स्कॅना वरवीं काळजाचे रचनेचें परिक्षण, योग्य झडपेची निवड आनी प्रत्यारोपणाचें नियोजन केलें. चेन्नयंतल्या एमएमएम हॉस्पिटलाचे डॉ. शिवकुमार कोथंडम हांणी प्रॉक्टर म्हणून मार्गदर्शन केलें जाल्यार थायलंडांतले व्हीनस पी-व्हॉल्व्हाचे वरिश्ठ तांत्रीक विशेशज्ञ नत्ताया खानारसा हांणी तांत्रीक सहकार्य केलें.

वरिश्ठ भूलतज्ञ डॉ. अविनाश लोंढे, डॉ. पूजा भुवालका, हृदयरोगतज्ञ डॉ. पूजा कुलकर्णी आनी कॅथलॅबांतल्या तांत्रीक कर्मचाऱ्यांनीय हे प्रक्रियेत म्हत्वाचें योगदान दिलें. हे कामगिरी खातीर हॉस्पिटलाचे सीईओ डॉ. एम. डी. दीक्षित, संचालक अभिनंदन पाटील, युवा फुडारी उत्तम पाटील हांणी कवतूक केलें.

येसस्वी शस्त्रक्रिया केल्ली अरिहंत हॉस्पिटलाची टीम.

  • (लुईस रॉड्रिग्स)

 

 

Related Posts

POPULAR NEWS

EDITOR'S PICK