लुईस रॉड्रीग्स हांची अ.भा.को.प.च्या सल्लागार पदाचेर निवड

उजवाड ब्युरो, मडगांव : उजवाड संपादक आनी कोंकणी वावराडी लुईस रॉड्रीग्स हांची अखिल भारतीय कोंकणी परिशदेच्या सल्लागार पदावयर निवड जाल्या. तांची निवड जाल्याचे पत्र परिशदेचे अध्यक्ष अरुण उभयकर हाणीं धाडला. लुईस रॉड्रीग्स हे हाचे पयली परिशदेच्या कार्यकारी समितीचे सदस्य म्हूण फाटली पांच वर्सां वावुरल्यात.
लुईस रॉड्रीग्स हे सध्या दि गोवन, गोवन वार्ता आनी भांगरभूंय दिसाळी तशेच प्रुडंट टि.व्ही. चे बेळगांव ब्युरो चीफ म्हूण फाटल्या 8 वर्सांथावन वावुरतात. घाटमाथ्यावयली कोंकणी भास आनी संस्कृताय हाचेर केंद्र सरकारच्या सांस्कृतिक मंत्रालयाची दोन वर्सांची फेलोशीप तांणी यशस्वी रितीन पुराय केल्या. तेच भाशेन कोंकणी भास आनी संस्कृताय हांचे संवर्धनापासत ताणीं केल्ल्या वावरा खातीर तांकां कर्नाटक आनी गोंय सरकार तेच भाशेन वेगवेगळ्या संघसंस्थांनी पुरस्कृत केला.
सामाजिक वावरांत लेगीत तांचे योगदान खूब मोलादिक आसा. बेळगांव दियोसिजीचे मानद पब्लीक रिलेशन सेक्रेटरी म्हूण फाटली 12 वयर वर्सा ते वावुरतात आनी ह्या मळार खूब मोलादिक वावर करतात. तांच्या जनसंपर्काचे आधाराचेर बेंगळूरच्या गार्डियन सहकारी बँकेचे मेंटर आनी सल्लागार म्हूण तांची हालीच नेमणूक जाल्या.
एक धडाडीचे पत्रकार, नामणेचे संपादक आनी तळमळीचे सामाजिक वावराडी आनी कोंकणी कार्यकर्तो म्हूण लुईस रॉड्रीग्स हांच्या निवडीवोरवीं घाटमाथ्यावयल्या कोंकणी भास आनी संस्कृतायेचे उदरगती खातीर चालना मेळटली हातूंत दुबाव ना, अशें ज्येष्ठ कोंकणी कवी आनी परिशदेचे सरकार्यदर्शी गौरीश वेर्णेकार हाणीं म्हळा.

Related Posts

POPULAR NEWS

EDITOR'S PICK