उजवाड ब्युरो,बेळगांव : कर्नाटक सरकारान बायलां खातीर शक्ति येवजणे खाला राज्यभर खंयच्याय सुवातेर फुकट प्रवास सुरू केला. हे येवजणेक बायलांक व्हड प्रतिसाद मेळपाक लागला. पूण शिमेवयल्या वाठारांनी रावपी बायलांक महाराष्ट्राक वचपी कर्नाटक बशींत बसपाक मेळनाशिल्ली. पूण, आतां वायव्य येरादारी मंडळान ही येवजण कोल्हापूर, इचलकरंजी, मिरज म्हळ्यार कर्नाटक शिमेसावन वीस किलोमीटर अंतराचेर वाडयल्या. ताची अंमलबजावणीय सुरू जाल्या.
काँग्रेसीन सत्तेर येवपा खातीर बायलांक फुकट बस सेवा दिवपाचें उतर दिल्लें. सत्तेर आयले उपरांत ही येवजण
अंमलबजावणी सुरू जाल्या. फुकट प्रवासाक बायलां कडल्यान व्हड प्रतिसाद मेळपाक लागला. खाजगी येरादारी करप्यां कडल्यान
हरकत आसून लेगीत सरकार आपल्या निर्णयाचेर खर आसा. बायलां विभागांतल्यानय खोशी उक्तायतात. पूण, हें
ही येवजण फकत कर्नाटकांत मर्यादीत आशिल्ली. देखून शिमेच्या वाठारांनी रावपी बायलांक लागींच्या गांवांत वचपा खातीर पयशे दिवचे पडटालें. देखून कर्नाटक महाराष्ट्र शिमेवयल्या वाठारांतल्या गांवांकय हे येवजणेचो लाव मेळचो अशी मागणी आशिल्ली. सरकारान दिल्ले म्हायती प्रमाण
येवजणेचो विस्तार केला.
कर्नाटकांतल्या बायलांक आतां महाराष्ट्राच्या शिमेवयल्या वाठारांनी 20 किमी अंतराचेर बशींतल्यान फुकट प्रवास करपाक मेळटलो. वायव्य कर्नाटक येरादारी मंडळान जाहीर केल्ले वळेरे प्रमाण कर्नाटक बशींक हुपरी, गडहिंग्लज, इचलकरंजी, मिरज, हलकर्णी, नागणवाडी कोल्हापूर, कोवाड,नरसिमवाडी हांगा फुकट प्रवास करपाक मेळटलो. कर्नाटकांत रावपी बायलां. तांकां आपलें आधार कार्ड दाखोवन शून्य रुपया तिकेटीन प्रवास करपाक मेळटलो.
पूण, ह्या वाठारांतल्यान महाराष्ट्राक वचपी कर्नाटक बशींचेर शुल्क घेताले.
आमी वायव्य येरादारी मंडळाचे विभागीय नियंत्रण अधिकारी गणेश राठोड हांचे कडेन संपर्क सादलो तेन्ना बायलां खातीर ही येवजण वाडयल्या अशें तांणी सांगलें. ही सेवा महाराष्ट्रांतल्या 16 गांवांक दिल्या. हे येवजणेची अंमलबजावणी सुरू जाल्या.









