सांत फ्रान्सीस शावेर पवित्र कूड उक्तावण-दर्शन सुवाळ्याक सुरवात

उक्तावणाक हजारांनी भाविकांनी लायली हाजेरी

गाब्रियेल डिसोझा, उजवाड ब्युरो, आदलें गोंय  : दरेकी धा वर्सांनी जावपी सांत फ्रान्सीस शावेराच्या पवित्र कुडिच्चोया दर्शन सुवाळ्याक बिरेस्तार 21 नोव्हेंबर सावन हजारांनी भावीकांचे उपस्थितींत सुरवात जाली. ४५ दीस म्हणल्यार ५ जानेवारी २०२५ मेरेन पवित्र कूड दर्शना खातीर पोरणें गोंयच्या से कॅथेड्रल इगर्जेंत आसतली. राज्यपाल पी. एस. श्रीधरन पिल्लई, मुख्यमंत्री डॉ. प्रमोद सावंत, येरादारी मंत्री मॉवीन गुदिन्हो हांचे सयत हेर मानेस्तांनी पवित्र कुडीचें दर्शन घेतलें. दिल्लीचे आर्चबिशप अनिल कुटो, आर्चबिशप फिलीप नेरी फेर्रांव हांचे सयत हेर आर्चबिशप आनी देश भरांतल्यान बिशप आनी पाद्री-माद्री व्हड संख्येन हाजीर आशिल्ले. उक्तावणाच्या मिसा उपरांत धार्मिक कांतार आनी वरेसावांच्या सुमधूर वातावरणांत पवित्र कूड बॅसिलिका इगर्जेंतल्यान सी कॅथेड्रल इगर्जेंत व्हेली.

अंदू देश-विदेशांतल्यान ५० लाखां वयर पर्यटक आनी भावार्ती पवित्र कुडीचे दर्शन घेतले. भावार्त्यांच्या पिवपाचें उदक, शौचालय, रेस्ट रुम, दिका दाखोवपाचे बोर्ड, पार्किंगांतल्यान इगर्जेंत वचपा खातीर खाशेल्यो गाडयो हांची वेवस्था आसा.
पवित्र कूड दर्शन सुवाळ्या खातीर हेर राज्यां सयत परदेशांतल्यान भावार्ती येतात. तांकां रावपा खातीर पिलिग्रिमेज विलेजीची खासा वेवस्था केल्या. अंदूं पयलेच खेपे अशा तरेची रावपाची वेवस्था केल्या. ३ डिसेंबराक जावपी फेस्ताक मुख्यमंत्री आनी हेर मानेस्तांक खासा आमंत्रणां दिल्यांत. २७ डिसेंबराक लायट आनी म्युझिक शो जातलो. जो अंदूंचे कार्यावळीचें खाशेलें आकर्शण आसतलें.

Related Posts

POPULAR NEWS

EDITOR'S PICK