उजवाड ब्युरो, बेळगाव: आयतारा २४ नोव्हेंबराक क्रिस्त रायाच्या परबेच्या निमतान बेळगांवच्या कॅथलिक समाजान धर्मीक मिरवणूक घडोवन हाडली.
बेळगांवचो बिशप रेव्ह. डॉ. डेरेक फर्नांडीस हाच्या आध्यात्मिक मार्गदर्शना खाला आनी फुडारपणा खाला आयोजीत केल्ली ही मिरवणूक सांजेच्या 4 वरांचेर फातिमा कॅथेड्रला थावन सुरू जाली.
बेळगांव आनी वाटारांतल्या पाद्री, माद्री, दादलें, बायलो आनी भुरगीं मेळोवन सुमार १५०० लोकांनी मिरवणुकेंत वांटो घेतलो , प्रार्थना केली आनी क्रिस्त रायाची स्तुती गायली. कारवारथावन मुद्दाम आयिल्ल्या बँडान सुमधुर गितां वाजयली. ल्हान भुरगीं मार्गांत गुलाबाच्यो पाकळ्यो उडोवन जेजू रायाचे स्वागत करताली.



कॉन्व्हेंट रोड, ग्लोब थिएटर, खानापूर रोड , धर्मवीर संभाजी चौक, कॉलेज रोड, वनिता विद्यालयांतल्यान फुडें वचून सेंट झेवियर हायस्कुल कॅम्पसांतल्या इमाक्युलेट कॉन्सेप्शन इगर्जेंत मिरवणूक सोंपली.
बिशप फर्नांडीस हांणी आपल्या शेर्मावांत लोकांक एकामेकांची आनी गरजेवंतांची सेवा करपाचें आवाहन केलें. ” म्हजे राज्य ह्या संसाराचें न्हय, ‘ तुमी म्हज्या ल्हान भावांक जें कितें करतात तें तुमी म्हाका करतात’ अशें जेजून सांगिल्लें,.
जेजून सांगल्याबाशेन आमी एकामेकाची आनी दिन दलितांची सेवा करुंक जाय.” अशें आवाहन बिशप फर्नांडीसान केलें.
पवित्र बायबलाचो उल्लेख करून ताणें फुडें सांगलें की, देवान संवसार रचलो आनी तो मनशाक राज्य करपाक आनी वापरपाक दिलो. ” पूण मनशान ताचो गैरवापर केलो आनी सध्याच्या अवस्थेंत हाडलो. आमी देवाच्या उतरान, शांती, मोगान आनी भावपणांत जियेल्यारूच हो संवसासर मूळ स्थितींत परतून हाडूंक शकतले.” तांणी स्पश्ट केलें.
क्लारा फर्नांडीस आनी हेरांच्या फुडारपणा खाला एका पंगडान मिरवणुकेक मार्गदर्शन आनी नियंत्रन केले.










