मानेस्तांनी बेळगाव गवळीबापाक दिल्यो नातालाच्यो परबीं

उजवाड ब्युरो : बेळगांवचो बिशप रेव्ह डॉ. डेरीक फर्नांडीस हाणीं लोकांनी शांतताय, धर्मीक समरसतायेचे राजदूत जावचें आनी वंचित आनी कुशीक काडिल्ल्या लोकां क दया आनी मोग दिवंचो अशें आवाहन केलां. तशेंच सामान्य जिवीताच्या वयर सरून कृपा आनी पवित्रतायेचें जिवीत जगपाचें आवाहन ताणें केलें. बिरेस्तारा सांजवेळा नाताळाच्या सांजेर बेळगांवच्या मानेस्तांच्या हाजिरेंत बिशप फ़र्नांडीस नाताळाचो संदेश दितालो.

समाजातल्या वेगवेगळ्या क्षेत्रांतले वरिश्ठ अधिकारी, नोकरशाय, नामनेचे व्यक्ती बुधवारा सांजे बिशप हाऊसाक भेट दिवन आपलीं शुभेच्छा दिली. बायलां विकास आनी बाल कल्याण मंत्री लक्ष्मी हेबाळकर, कीलई चेअरमन डॉ. प्रभाकर कोरे, खासदार जगदीश शेट्टर, आमदार राजू सेट, आयजीपी विकास कुमार विकास, ब्रिगेडियर जॉयदीप बॅनर्जी, जिल्होधिकारी मोहम्मद रोशन, जिल्हा पंचायत मुखेल कार्याधिकारी राहुल शिंदे, पुलीस आयुक्त इयाडा मार्टीन मारबनियांग, एसपी डॉ. भीमाशंकर गुळेद, डॉ एमडी दीक्षित, डॉ गिरीश सोनवाळकर, डॉ बीएच मेटगुड हे आनी हेर मानेस्तांनी  बिशप डेरेक फर्नांडीस हांकां मेळून तांकां नाताळाच्यो परबीं दिली.

फुडें उलयतना बिशप फर्नांडीस हांणी सांगलें की संवसारभरांतले क्रिस्तांव जेजू क्रिस्ताच्या जल्माचें २०२५ वर्साचें महोत्सव अर्थात ज्युबिली उत्सव वर्स मनयतात म्हणून ह्या वर्साचो नाताळ खूब खाशेलो. “जेजू आमच्या खातीर जल्मल्लो, आमकां पातकांतल्यान वाटावंक आनी देवा कडेन मेळोवंक. ताच्या जल्माक लागून देवाचो मनीसपणाचेर आशिल्लो मोग आनी आमचे मदीं रावपाची इत्सा दिसून येता. आमच्या उत्सवांत आनी आमच्या दिसपट्ट्या जिवितांत ख्रिस्ताक केंद्रस्थानी दवरपाचो संकल्प करुया अशें बिशप फर्नांडीस हांणी उलो मारलो.

नाताळाच्या कॅरोल गावपा वांगडाच मानेस्तांच्या हाजिरेंत नाताळाचो केक कापलो. ह्या संदर्भार व्हिकार जनरल फादर फिलीप कुटी, फादर जेराल्ड डीसिल्वा, फादर प्रमोद कुमार, क्लारा फर्नांडीस, लुईस रॉड्रिगीज आनी हेर हाजीर आशिल्ले.

फोटो: बिशप डेरेक फर्नांडीस, मंत्री लक्ष्मी हेब्बलकर, आमदार राजू साईत, डॉ. प्रभाकर कोरे आनी हेर मानेस्त.

Related Posts

POPULAR NEWS

EDITOR'S PICK