जबरदस्तीन धर्मांतर केल्यार 7 वर्सा मेरेन बंदखण
उजवाड ब्युरो, मुंबयः महाराष्ट्रांत जबरदस्तीन, फसोवन, हांयस दाखोवन वा लग्नाचें फटीचें आस्वासन दिवन करतात तें बेकायदो धर्मांतर आडावपा खातीर ‘महाराष्ट्र धर्मस्वातंत्र्य कायदो 2026’ निमाणें राज्यभर चालीक लायलो, राष्ट्रपती द्रौपदी मुर्मू हांचे मंजुरे उपरांत 30 जुलय दिसान राज्य सरकाराच्या अधिकृत राजपत्रांत ‘गॅझेट’ हो कायदो उजवाडायलो आनी तेच तारखे सावन तो अधिकृतपणान लागू जालो. ताका लागून आतां फटयिल्ल्या आनी बेकायदो धर्मांतराच्या प्रकरणांत कायदेशीर कारवाय करतले.
मार्च म्हयन्यांत जाल्ल्या महाराष्ट्राच्या अर्थसंकल्पीय विधीमंडळ अधिवेशनांत हैं विधेयक दोनूय सभाघरांनी एकमतान मंजूर केल्लें. उपरांत फुडले मंजुरी खातीर तें राज्यपाल आनी राष्ट्रपतीं कडेन धाडून दिल्लें. राष्ट्रपतींची सय जाले उपरांत ह्या कायद्याचें अधिकृत अध्यादेशांत रुपांतर जालें.
कायद्यांतल्यो मुखेल आनी कडक तरतुदी
खर ख्यास्तीची तरतूदः कोणाचीय फटवणूक करून, चेपण हाडून वा चुकीची म्हायती दिवन धर्मांतर घडोवन हाडल्यार दोशीक सुमार 7 वर्सी मेरेन बंदखणीची ख्यास्त जावंक शकता.
1) परतून गुन्यांव केल्यार 10 वर्सा बंदखणः होच गुन्यांव एका परस चड फावटी वा परतून घडत जाल्यार बंदखणीचो काळ 10 वर्सा मेरेन वाडोवपाची तरतूद कायद्यांत केल्या.
2) 60 दिसा आदीं पुर्वसुचोवणी गरजेचीः जर कोणाकूय स्वेच्छेन आनी स्वताचे मर्जीन धर्मांतर करपाचें आसत, जाल्यार तांणी संबंदीत जिल्हो दंडाधिकाऱ्यांक 60 दीस आदीं तशी पुर्वसुचोवणी दिवप गरजेची आसतली.
3) कागाळदारांची व्याप्ती वाडयलीः फक्त पिडीत व्यक्तीच न्हय, जाल्यार ताचे आवय- बापूय, भाव- भयण वा हेर लागींचे सोयरेय ह्या कायद्या खाला पुलिशेंत अधिकृत कागाळ दाखल करूंक शकतात.
आंतररधर्मीय लग्नांक लक्ष्य करप हो हेतू न्हयः मुख्यमंत्री
ह्या कायद्याचें समर्थन करतना मुख्यमंत्री देवेंद्र फडणवीस हांणी स्पश्ट केलें की, बळजबरीन वा फटवणुकेन जावपी बेकायदो धर्मांतराक आळो घालप होच कायद्याचो मुखेल उद्देश आसा. खंयच्याय स्वेच्छेन जावपी धर्मांतर वा कायदेशीर आंतरधर्मीय लग्नांक लक्ष्य करप हो ह्या कायद्याचो हेत मुळांतूच ना. मजगतीं, उत्तर प्रदेश, मध्य प्रदेश, गुजरात, हिमाचल प्रदेश आनी कर्नाटक हांचे सयत देशांतल्या सुमार 12 परस चड राज्यांनी आदीं सावनूच अशे तरेचो धर्मस्वातंत्र्य आनी धर्मांतर विरोधी कायदे अस्तित्वांत आसा. आतां हे वळरेंत महाराष्ट्राचोय 13 वें राज्य म्हूण आस्पाव जाला.










