उजवाड ब्युरो, पुणे : आयतार,,ता ११ दिसा सकाळी ११ च्या दरम्यान पुण्याच्या फामाद डिनोबिली कॉलेजचो रम्य परिसर कोंकणीच्या अस्तित्वान अधिकच रम्य जाल्लो. कित्याक पांचव्या सैमाचे देणे लाभिल्ल्या ह्या परिसरांत पुणे शाराच्या कोंकणी भाशिकांच्या इतिहासांतली एक म्हत्वाची बसका जाली. सबंद पुणे शारांत व्हड संख्येन सभासद आशिल्ल्या आनी जानेवारी 2027 मदें आपल्या स्थापनेचो रुप्या महोत्सव मनोवपी पुणे कोंकणी क्रिस्थ सभेच्या ( PKKS) च्या नव्या अध्यक्षाची निवड जाली. डिनोबिली कॉलेजीच्या सोबीत आनी पांचव्या वनराईन नेटिल्ल्या ह्या परिसरांत सभेच्या पांचवे अध्यक्ष म्हुण सभेच्या एक्झिक्युटिव्ह समितीच्या बसकेत निवृत्त रेल्वे अधिकारी, सामाजीक वावराडी आनी उजवाडचे संपादकी सल्लागार तसेच उमेदवंत व्यक्तिमत्वाचे एलियास बारदेस्कर (गोविया) हांची एकमतान निवड जाली.
नव्या कमिटी खातीर तीन उपाध्यक्षांची निवड: नगर रोड विभाग – श्री. जॉन फर्नांडिस; पुणे सिटी विभाग – आल्बर्ट (सागर) बार्देसकर, आनी पिंपरी-चिंचवड (PCMC) विभाग कस्टोडियो डिसोझा ह्या मानेस्तांची लेगीत एकमतान निवड जाली. ह्या बैठकींत पीकेकेएसचे अध्यक्ष व्हिन्सेंट डायस हांणी नव्या अध्यक्षाचें नांव जाहीर केलें. सगळ्या २० नव्या कमिटी वांगड्यांनी एकमतान श्री. एलियास बार्देसकर हांच्या नांवाक पसंती दिली. नव्या कमिटींत एलियास बारदेस्कर हांचे सयत एकूण २१ वांगडी आसात.
एकवोटान रावुया, गरीब-गरजेवंतांची सेवा करुया : एलियास बारदेस्कर : ह्या वेळार उलयताना नवे अध्यक्ष बारदेस्कर हांणी सगल्यांक सांगाता घेवन समाजाच्या सर्वांगीण उदरगती खातीर, तसेच गोर गरीब, गरजेवंत आनी तरणाटे हांच्या खातीर निश्टेन आनी निसुवार्थ पणान वावर करपाची भास दिली. सभेच्या आदल्या सगळ्या अध्यक्षांक, संस्थापकांक आनी पदाधिकाऱ्यांक धिनवास दिलो. ह्या वेळार व्हिन्सेंट डायस, ॲड बस्तु रेगे, पीटर डिसोझा आनी मानेस्तांची अभिनंदनपर तसेच मार्गदर्शक भाशणा जाली.
ह्या वेळार सभेचे पयले अध्यक्ष आल्फि मंतेरो, तसेच आदलेअध्यक्ष पिटर डिसोझा, आंजेलो मिनेझीस आनी विध्यमन अध्यक्ष व्हिन्सेंट डायस, तसेच संतुलन चे संस्थापक ॲड बस्तू रेगे , विनोद पिंटो, आंतोन डिक्रुझ, रॉबर्ट वियेगास, फ्रँकी पिंटो, सायमन डिसोझा आनी हेर मानेस्त हाजीर आसले.
घांटमाथो आनी सिंधुदुर्गांतल्या कोंकणी क्रिस्तावांची एक नावादिक संघटना आशिल्ल्या पीकेकेएसच्या प्रतिश्ठीत अध्यक्षपदाचेर मुळावे हरळी (गडहिंग्लजचे) चे सुपुत एलियास बारदेस्कर हांची निवड जाल्या खातीर आजरा, गडहिंग्लज, चंदगड आनी दक्षीण महाराश्ट्र प्रदेशांतल्या कोंकणी मोग्यांमदें खुशालकाय पसरल्या.
देव नव्या कमिटीच्या सगळ्या वांगड्यांक आशीर्वाद दिवं आनी सभेच्या उज्ज्वल भवितव्या खातीर तांकां मार्गदर्शन करूं अशो सगळ्यांनी नवे अध्यक्ष एलियास बारदेस्कर हांकां परबीं दिल्यो !
(व्हिन्सेंट डायस हांच्या इन्पुट्सचेर आधारीत)












