लुईस रॉड्रीग्स, उजवाड ब्युरो :
सुंकारा दनपारा उजवाड व्हॉट्सॅप ग्रुपचेर ॲड संजय डिक्रुझान उडयिल्लो मेसेज पळयलो आनी धक्कोच बसलो. फादर कुस्तास लिमा नो मोऽऽर असो हो मेसेज वाचून विश्र्वास जाई ना जालो.
उपरांत आतीश आनी फादर सायमनाक फोन केलो आनी खात्री जाली. खबर खरी आसली. फादर कुस्तास आमचे मदें रावले नांत. उजवाड वेबसायटाचेर ही खबर अपलोड करतकुच भावार्त्यांनी अक्षरश: ह्या वेबसायटाचेर गर्दीच केली.
अरे ! कितें चलला हें !! फादर ऑगश्टीन हांका वचून दोन वर्सां जातात न जातात तोच तांचो इश्ट आनी गावभाव लेगीत तांचे फाटल्यान गेलो ? एक तरेची शोकंतिकाच ही !!! आमचे तरणाटे पाद्री आपल्या भलायकीकडेन दुर्लक्ष करतात, तांकां वेळेत आनी योग्य इलाज मेळ नां आनी आमच्या समाजाचे व्हड लुसकाण जाता …. खरेच खूब आनी खूब शॉकींग गजाल हीं !
फादर ऑगश्टीन आनी फादर कुस्ताच दोगुंय संगरगळी गावचे सुपूत. फादर ऑगश्टीन १९६८चे तर फादर कुस्तास १९७५चे. सैमाचे सोबीत देण्यांनी आशिर्वादीत जाल्ल्या संगरगाळी गावांत सांत इनासाचे बेसावान दोगुंय गरीब पूण भावार्थी घरांनी ल्हानाचे व्हड जाले. जेन्ना तरणाटे आपल्या जाण्ट्या पिरायेंत नोकरी सोदून पर्जळीत फुडाराची सपना पळयतात त्या पिरायेंत ताणीं देवाची आनी ताच्या लोकांची सेवा करपाचे व्रत्त घेतले. सर्गेस्त फादर ज्यो पिंटो, सर्गेस्त फादर कोलमन आनी हेर जेज्वीट पाद्रींच्या मार्गदर्शनान आनी प्रेरणेन दोगांय जेज्वीट पाद्री जाले आनी आपलो वावर खूब धडाक्यात सुरु केलो. इतलो की तांका सर्गार पावपाची गडबड आसा हाची कोणांक मातुय कल्पना आयली नां. ना जाल्यार आमी सांगता आसले, ‘ बाबांनु, जरा दमान घेयात, देवाच्या पर्जेक तुमची खूब वर्सांपर्यंत गरज आसा,‘ !!!
पूण ते शक्य जाले नां. दोगांनीय देवाच्या परजेची अगदी झपाटल्या भाशेन सेवा केली !! दोगांनीय जायते नाव जोडले आनी तितल्याच गडबडीन दोगांय देवाच्या सेवेत डायरेक्ट सर्गार पावले.
आता, फादर कुस्तास आनी फादर ऑगस्टीन हांकां भाग्यवान म्हणचे की आमा भावार्त्यांचे आनी चडकरून गडहिंग्लजच्या भावार्त्यांचे दुर्भाग्य म्हणचे असो व्हडलो प्रश्र्न उप्रासला. एकाद्रे तुफान येवचे तशीं ही जोडगळी आमच्या जिवीतांनी आनी चडकरून घांटमाथ्यार येता कितें आनी कोणाच्या धेनामनांत नासताना आमचे मदल्यान सदाकाल वयता कितें …. खरेच विश्र्वास जाईना.
देवाच्या राज्यांत लेगीत तांचे कार्य तितल्याच गडबडीन आनी उमेदीन सुरु जाला आसतले हातुंत दुबाव ना. तुर्ताक, फादर कुस्तास हांकां मोगाची आदरांजली आनी तांच्या फामिलिक आनी जेज्वीट सोसायटींतल्या पाद्रींक आनी आमचेच आमकां भुजवण दिताना तांच्या शाश्र्वत जिवीता खातीर मागुंया.
कारण मिमांसा आनी नियाळ जावप गरजेचे
फादर कुस्तास हांच्या मरणा उपरांत हांव बेळगांवच्या गवळी बापा कडेन उलयतालो. खरेच आयज तरणाट्या पाद्रींची पिळगी आपल्या भलायकी कडेन दुर्लक्ष करुंक लागल्या कितें ? तांकां वर्सांतल्यान एक तरी फावटी आपले हेल्थ चेक अप मँडेटरी करुंक जाय कितें? तांकां बेस्ट ट्रीटमेंट ऑप्शन मेळुंक जाय कितें ? ह्या गजालीचेर विचार करुंक जाय.
ना जाल्यार आपल्या कार्यभाराच्या जोशांत हे आमचे तरणाटे पाद्री आपल्या भलायकीकडेन दुर्लक्ष करतलें आनी तांच्या अचानक वचण्यान समाजाचे व्हड लुसकान जातलें.
खूब आनी खूब अंतर्मुख जावन चिंतन करपाची वेळ आयल्या !!!!
………. luirods@yahoomail.com 8618643958










