बिडीच्या जाण्ट्या नागरिकांच्या आत्महत्त्येन सगळेकडेन खळबळ, मोबायल फ्रॉड्स्टरांनी धमकी दिवन घेतले मोलादिक जीव

उजवाड ब्युरो, खानापूर: खानापूर तालुक्याच्या बीडी हांगा ब्रेस्तारा सांजवेळार एक जाण्टे जोडपें मेल्लें अवस्थेंत मेळ्ळें. बिडीच्या क्रिस्तांव गल्ली हांगा रावपी डोर्गजेरोन उर्फ डायगो सांतान नाझरेथ (82) आनी ताची बायल फ्लॅव्हियाना डायगो नाझरेथ (79) हांचीं मडीं ब्रेस्तारा सांजवेळा सुमार 8 वरांचेर शेजाऱ्यांक मेल्लीं मेळ्ळीं. रिटरीटा खातीर पटी घेवंक कांय जाण तांचे घरा गेल्या उपरांत हो प्रकार दिश्टी पडलो. गोंयच्या थोड्या व्यक्तीं कडल्यान आनी हेरां कडल्यान हँडलोन घेतिल्ल्याचो उल्लेख जोडप्यान केला, जो तांणी आपली मालमत्ता विकून परत करपाक जाय अशें सांगलां. खबर सगळेकडेन वाऱ्याभाशेन पसरली आनी सबंद घाटमाथो परिसरांत खळबळ उडुन गेल्या.

सविस्तर वृतांत असो. कांय जाण ब्रेस्तारा सांजे रिटरिटा खातीर पटी घेवंक गेल्ले तेन्ना फ्लॅव्हियाना तांच्या घरांत भितर निर्जीव पडून आशिल्ली जाल्यार डायगो घराच्या भायर जमनीपोंदा आशिल्ल्या उदकाच्या टांकये भितर रगताच्या कुंडांत मेळ्ळो. शेजाऱ्यांनी रोखडीच नंदगड पुलिसांक कळयली, उपरांत नंदगड पोलीस इन्स्पेक़टर आनी ताचो पंगड रोखडोच घडणुकेच्या सुवातेर पावलो आनी प्राथमीक चवकशी उपरांत मडें खानापूरच्या सरकारी हॉस्पिटलांत व्हेली. चवकशी जावपा मेरेन जोडप्याचें घर सील केलां.

घरांत इंग्लिशींत बरयल्ली आत्महत्याची नोट मेळ्ळी, तातूंत डायगो नाझरेथान दिल्लीचो आपूण उंचेल्या पांवड्याचो दूरसंचार अधिकारी अशें सांगपी व्यक्तीन धमकायल्या अशें सांगलां. आरोपीत फटींग मनशान डायगोक ताच्या सिम कार्डाचो गैरवापर केल्ल्यान ताका डिजीटल अरेस्ट करपाची धमकी दिली.

फुडले तपासणे खातीर दोनुय कुडी खानापूरच्या सरकारी हॉस्पिटलांत व्हेले. जाल्यार मरणाचे नेमके कारण पोस्ट मॉर्टम अहवाल आयले उपरांत कळटले. पोलीस अधिकाऱ्यांनी नंदगड पुलीस स्टेशनांत अबेटमेंट टु मर्डर/ सुइसायड अशें आत्महत्या करपाक आदार दिवपाची केस सुरू केल्या. मोबायल, एक कोयतो आनी सुसाइड नोट पुलिसांनी आपल्या ताब्यांत घेतल्या. हे घडणुके भोंवतणी आनीक तपशील सोदून काडपा खातीर चवकशी सुरू आसात. मेल्लो डायदो मंत्रालय (सचिवालय), महाराष्ट्र सरकारांतल्यान निवृत्त जाल्लो. ताणे आपल्या आत्महत्या नोटींत आपल्यो दोगांच्योय कुडी अभ्यासा खातीर वैजकी म्हाविद्यालयांक दान करच्यो अशें नमूद केला. ते प्रमाण पुलिसांनी आपली प्राथमीक चवकशी औपचारिकताय पुराय केल्या उपरांत आत्मघाती नोटांतल्या जोडप्याक जाय ते प्रमाण मडीं बेळगाव इन्स्टिट्युट ऑफ मेडिकल सायन्स कडेन स्वाधीन केली.

हे घडणुकेचो खोलायेन हुस्को आनी दुख्ख उक्तायतना बेळगांवचो एसपी डॉ भीमशंकर गुळेद हांणी नागरिकांक कसलेय बनावट फोन आयले उपरांत निर्भयपणान रोखडोच पुलिसां कडेन संपर्क सादचो असो उलो मारला. ह्या जोडप्यान शेजाऱ्यांक वा पुलिसांक कळोवंक ना आनी तांणी आपलें जिवीत सोंपयलां हें दुर्दैवी आनी तितलेंच धक्को दिवपी आसा,फफ डॉ गुळेद हांणी सांगलें.

काय दीसा फाटीं सुमित बिर्रार नावाच्या दूरसंचार विभागाच्या नोटिफिकेशन युनिटाचो कर्मचारी म्हूण भेस करून म्हाका धमकायलो आनी रक्कम धाडत रावपाक सांगलें, कांय बेकायदेशीर जायरातीं खातीर आनी त्रास दिवपी संदेशां वोरवीं ताणें म्हाका भरपूर त्रास दिलो. एक अनिल यादवूय हांणेय म्हाका भिरांकूळ परिणाम सांगले आनी ताणें फिक्स्ड डिपॉझिट आनी हेर मालमत्तेचोय तपशील घेतलो. सगळें सोंपसर ताणीं म्हजेकडल्यान दुडू घेतली आनी आतां म्हजेकडेन कितेच नां. आमच्या फाटल्यान कोणूच नाशिल्ल्यान आनी कोणाच्याय दयेर रावपाक जायना म्हणून आमकां आमचें जिवीत सोंपपाक आवडटलें,फफ अशें डायगोन आपल्या आत्महत्या नोटींत सांगलां.

तशेंच गोंय आनी मुंबयच्या थोड्या लोकां कडल्यान भांगराचें रीण आनी हाताचें रीण घेतिल्लें अशें तांणी सांगलां, तें भांगर आनी हेर मालमत्ता विकून परतून परतून दिवचें अशें तांणी सांगलां.

मोबायल हँडसेट, सुसाइड नोट आनी डायगोन वापरिल्लो चॉपर पुलिसांच्या ताब्यांत आशिल्ल्यान ह्या प्रकरणांत दरेका कोनाची चवकशी सुरू आसा अशें एसपी डॉ गुळेद हांणी सांगलें. तेच भाशेन फ्रॉड करपी वेगवेगळे फोन नंबर आनी सिम वापरून लोकांची लूट करतात तेन्ना लोकांनी जागरुक रावंक जाय अशेय ताणीं सांगले.

Related Posts

POPULAR NEWS

EDITOR'S PICK