उजवाड ब्युरो, बेळगाव : वैजकी गूढ म्हणूं येता अशी ही गजाल। बेळगाव लागी आशिल्ल्या लागच्या चंदगडच्या एका बायलेन एक चलयेक जल्म दिलो आनी तिच्या पोटा भितर तिचो जुळो गर्भ रावता अशें दिसून आयलें. ही केस 5-6 लाखांतल्या 1 जाणांक दिसपी “भ्रूण-गर्भांत” ही एक दुर्मिळ घडणूक अशें मानतात. हांगाच्या केएलईएस डॉ प्रभाकर कोरे हॉस्पिटलांतल्या दोतोरांनी एक जटिल शस्त्रक्रिया करून आवय आनी भुरग्याक वाचयली. मुळावी गोंयची आनी केएलईएस डॉ प्रभाकर कोरे हॉस्पिटलांतल्या वैजकी पंगडाचो भाग आशिल्ली निओनॅटोलॉजिस्ट डॉ मनीषा भांडणकर हिचेय भुरग्यचो जीव वाटावंक मोलदिक योगदान आसा.
केएलईएस डॉ प्रभाकर कोरे हॉस्पिटलांतल्या दोतोरांनी दिलेल्या म्हायती परमाणे मुळांत गोंयचो आनी आतां गडहिंग्लज हांगा स्थायीक जाल्ल्या डॉ संजय शानबाग हाणें केल्ल्या अल्ट्रासाऊंड वेळार, गुरवारपणाच्या 28व्या सप्तकांत तांकां दिसलें की भुरग्याक पुळेर (सिस्ट) जाला अशें दिसता, पूण बारीकसाणेन पळयल्यार तो प्रत्यक्षांत त्या भूरग्याच्या पोटा भितर आशिल्लो “गर्भ” आशिल्ल्याचें दिसून आयलें. ते अर्भक 37 सप्तकां उपरांत जल्मले आनी फुडल्या शस्त्रक्रीयेखातीर ताका केएलई डॉ प्रभाकर कोरे हॉस्पिटलांत रेफर केलो.
जल्मिल्ल्या तिसऱ्या दिसा बालरोग सर्जन डॉ स्वप्नील पट्टनशेट्टी हांणी डॉ” साक्षम हांच्या आदारान ऑपरेशन केलें. आयव्हीसी, उजव्या मुत्राशयाच्या नाळयो आनी महाधमनी ह्या मुखेल नाळयांमदीं जुळो आम्निओटिक पुळेर आशिल्लो. सिस्ट आनी गर्भाचे भाग फुटनासतना बारीक विच्छेदन करून जटिल शस्त्रक्रीया करून तो पुरळ काडलो. एनेस्थेसिओलॉजिस्ट डॉ राजेश माने आनी डॉ.प्रियांका गाडवी हांणी अनेस्थेशीया दिलो. डॉ.मनीषा भांडणकर आनी डॉ.राम भट्ट हांच्या देखरेखी खाला एनआयसीयूंत ते भुरगें बरें जावपाक लागला.
“ गर्भांत गर्भ कित्याक निर्माण जावंक शकता हें निश्चीत ना; पूण डायम्निओटिक मोनोझायगोटिक जुळ्यांच्या गुरवारपणाच्या पयल्या कांय सप्तकांत एक गर्भ गुठलायल्या उपरांत दुसर् या विकृत जुळ्याक आवरण केल्लो जुळो “परजीवी” जाता आनी “यजमान” जुळ्याच्या रगत पुरवणाचेर आदारून आसता आनी आकार वाडत रावता अशें डॉ. भांडणकर हिणे सांगलें.
आमच्या पंगडान खुब अवघड शस्त्रक्रिया यशस्वी केल्य़चो म्हाका अभिमान आसा अशें केएलईएस हॉस्पिटलाचे अध्यक्ष डॉ प्रभाकर कोरे हांणी सांगलें. वैजकी संचालक डॉ(कर्नल) दयानंद आनी संचालकांनीय ह्या दुर्मिळ शस्त्रक्रियाचेर समाधान उक्तायला आनी खंयच्याय गुंतागुंतीच्या वैजकी प्रकरणांत केलेस हॉस्पिटलाचेर आदारून रावपाचो उलो मारला.
……….. समाप्ती
फोटो : दुर्मिळ शस्त्रक्रिया करपी पंगड. (Inset) भुरग्याच्या पोटा भितर रावपी जुळो गर्भ.
– लुईस रॉड्रिगीस










