
उजवाड ब्युरो, बेळगाव: बेळगाव आनी उत्तर कर्नाटक वाठारांतले चेडवांचे एक उत्कृश्ट हायस्कुल म्हणून फ़ामाद आशिल्ले कॅनॉसियन भयणीं कडल्यान वेवस्थापन जावपी डिव्हायन प्रॉव्हिडन्स हायस्कुल, बेळगाव, अंदूं आपलें शतमानी वर्स मनयता. ह्या उत्सवाचो एक भाग म्हूण शाळेच्या वेवस्थापन, कर्मचारी, पालक-शिक्षक संघटना आनी माजी विद्यार्थ्यांनी ह्या म्हयन्यांत वेगवेगळे कार्यावळी घडोवन हाडल्यात.
कॅनॉसियनांच्या इतिहासा विशीं म्हायती दितना सिस्टर रोसामा हांणी सांगले, १९२१ इस्वेंत पयल्या म्हा झुजाच्या उपरांत अनाथ भुर्ग्यांची काळजी घेवंक, १९२१ इस्वेंत टिळकवाडींत दान केल्ल्या जाग्यार डीवायन प्रॉविडन्स संघटना आनी शाळा सुरू जाली,
शतमानी उत्सवाचो एक भाग जावन आयोजीत केल्ल्या कर्यक्रमा विशीं म्हायती दितना मुख्याध्यापिका सिस्टर रोसामा जोसेफ हांणी सांगलें की, शेनवारा, १० डिसेंबराक सकाळीं ९ ते ११ मेरेन शांतताय रॅली गोवा वेस लागसारच्या शाळा परिसरांतल्यान सुरू जातली आनी पयलो रेल्वे गेट, टिळकवाडी पुलीस स्टेशन, बालिका आदर्श शाळा, समर्थ मंदिर, अनगोळ क्रॉस, स्मार्ट बाजार, हरी मंदिर, भाग्यनगर 10 व्या क्रॉसांतल्यान वचून आयएमईआर, गोमटेश शाळेंतल्यान परत येतली , गोगटे कॉलेज, आरपीडी क्रॉस, गोवा वेस स्विमिंग पूल आनी परत डीपी शाळेंत येतली. शांतताय रॅली शतवार्षिक वर्साच्या उत्सवाच्या बोधवाक्याच्या अनुरूप “सुसंवादात्मक सह-अस्तित्व”चो पुरस्कार करता.
शाळेंतल्या विद्यार्थ्यां खातीर शेनवार, 17 डिसेंबर सांजवेळा 4.30 वरांचेर जिर्गे ऑडिटोरियम, जेएनएमसी कॅम्पस, बेळगाव हांगा एक खाशेलें कार्यावळ जातली. शतमानी वर्साच्या समारोप सुवाळ्याचो एक भाग म्हूण शाळेचे विद्यार्थी वेगवेगळे सांस्कृतीक कार्यावळी सादर करतले. उच्च न्यायालयाची न्यायाधीश आनी शाळेची माजी विद्यार्थीनी श्रीमती के. एस. हेमालेखा, मुखेल सोयरी आसतली. जाल्यार डॉ. ऑड्रे डिसोझा, एफडीसीसी, प्रांतीय फुडारी, इंडिया सेंटर भोवमान सोयरी आसतली.
तशेंच शाळेच्या आदल्या विद्यार्थ्यां खातीर आयतारा 18 डिसेंबराक एक खाशेली कार्यावळ घडोवन हाडल्या, जी सकाळीं 9 वरांचेर शाळेच्या सभाघरांत सुरू जातली. आंतरराष्ट्रीय शास्त्रीय गायक, पंडित कैवल्य कुमार गुरव हांची कार्यावळ जातली. उपरांत आदल्या आनी सद्याच्या शिक्षकांक अभिनंदन दितले. हे निमतान सांस्कृतीक कार्यावळय आयोजीत केल्या.
पत्रकार परिशदेक प्राथमीक विभागाची मुख्याध्यापिका एसआर एल्सा, वेवस्थापक मेरी, माजी संघटनेची अध्यक्ष प्रो. वीना देसाई-कर्ची, उपाध्यक्ष कीर्ति दोडन्नावर, सचीव अंजली पंडित, कोषाध्यक्ष गौरी कोकणे, श्वेता रायकर आनी इस्कोलाचे स्टाफ़ हाजीर आशिल्ले.
……………
फोटो : सिस्टर रोज्म्मा पत्रकार परिशदेक संबोधीत करतना. शेजराक सिस्टर रोज अब्राहम, सिस्टर मेरी , वीना देसाय आनी हेर
News Views: 650








