आपली आंगवण भेटयच्याक आनी गोंयच्या सायबाचे दर्शण घेवच्याक घाटमाथ्यावयल्यान ७०० वयर पादयात्री गोंया रवाना

उजवाड ब्युरो, बेळगाव, ता. २९: चार दशकां परस  चड काळाची परंपरा चालू दवरून घाटमाथ्यावयल्या वेगवेगळ्या गांवांमदल्या आनी शारांमदल्या सुमार 700 यात्रेकरुंनी पोरन्या गोंयची पदयात्रा सुरू केल्या. कोल्हापूर आनी बेळगाव जिल्ह्यांतल्यान कांय यात्रेकरुंनी सोमारा सावन तीर्थयात्रा सुरू केली, जाल्यार कांय जाणांनी मंगळारा ती सुरू केली. सुमार 700 यात्रेकरू 2 डिसेंबराक पोरन्या गोंयांत पावून आपली आराधना आनी आंगवोन गोंयच्या साईबाच्या पांयांतळा सादर करतले.

उत्तर कर्नाटक वाठारांतल्यान स्वामी संप्रदाय आपणावपी जेजुईट, सर्गेस्त फादर प्रभुधर हांणी ह्या पदयात्रेची सुरवात केल्या उपरांत हें 42 वें वर्स . कोल्हापूर तालुक्यांतल्या आजरा शारासावन फकत सात यात्रेकरुं सयत सुरू जाल्ली पदयात्रा आतां बेळगाव आनी कोल्हापूर जिल्ह्यांतल्या लोकांमदीं लोकप्रिय जाल्या. मुंबय, पुणे आनी हेर वाठारांतल्यान सांत फ्रान्सीस शावेराचे अनुयायी हे यात्रेंत वांटो घेतात. तातूंतले जायते जाण गोंयांतल्या वेगवेगळ्या कोमुनिदादींचे गांवकार आसात.

जेन्ना Covid-19 ची लाट आसली ते वर्सा अर्थात 2020 सोडल्यार, दर वर्सा ही पदयात्रा चालूच आसा. 2019 वर्सा हो आंकडो 1000 भावार्ती हुंपून गेल्लो, पूण Covid खातीर तो उणो जाला आनी फुडल्या वर्सांनी तो वाडपाचो अदमास आसा, अशें खानापूरचे पॅरिश प्रिश्ट फादर कुस्तास लिमा हांणी सांगलें. पाद्री, धर्मीक आनी सामान्य व्यक्ती हांचे सांगाता हेर धर्मांतल्यो बायलो, दादले आनी भुरग्यांनी हे यात्रेंत वांटो घेतला.

“हांव म्हज्या भितर सासणाचो आनंद अणभवतां. एक अद्भुत आध्यात्मिक अणभव. गोंयचो साईब खरेंच आमचीं आंगवण आयकतलो आनी मध्यस्थी करतलो आनी अजापां करतलो, जशें ताणें इतलीं वर्सां जायत्या पादयात्रिंक आशीर्वाद दिला,” पयलेच फावट यात्रेकरुंक पुण्यांतल्यान पादयात्रेक पाविल्या विन्सेंट डायस हाणी सांगलें.

गडहिंग्लज, आजरा, कोल्हापूर, इचलकरंजी हांगाचे यात्रेकरुं सोमारा सावन तीर्थयात्रा सुरू करून चांदगड, भेडशी वरवीं चलत आसात, जाल्यार मंगळारा बेळगाव आनी खानापूरांतल्या यात्रेकरुंनी पदयात्रा सुरू केल्या. यात्रेकरू जंबोटी, चोर्ला वरवीं चलतले. हो सगळो पंगड 1 डिसेंबराक साखळी पावतलो आनी थंयच्यान  2 डिसेंबराक पोरन्या गोंयांत पावतलो.

 

Related Posts

POPULAR NEWS

EDITOR'S PICK