जिविताच्या भांगरा सुवाळ्यानिमतान… कुशल प्रशासक आनी सेवाभावी याज्ञिक डॉ. ऑल्वीन सुधीर

उजवाड ब्युरो : हुबळी-धारवाड डीनरीचे डीन आनी इन्फंट जीझस इगर्ज, हुबळीचे पॅरीश प्रिश्ट फादर डॉ. ऑल्वीन सुधीर हे शेनवार ता. 14 डिसेंबर 2024 दिसा आपल्या जिविताचो भांगरा सुवाळो मनयतात. त्या निमतान…

हालीच बेळगांव हांगा विश्वेश्वरय्या टेक्नॉलॉजिकल युनिव्हर्सिटींत जाल्ल्या 23व्या पदवीदान समारंभांत बेळगांव दियोसिजीचे ज्येश्ट पाद्री फादर ऑल्वीन सुधीर हांकां पी.एच.डी. मेळ्ळी. अशें तरेन एका नामांकित विद्यापिठाची डॉक्टरेट मेळोवन फादर ऑल्वीन हाणीं बेळगांव आनी सबंद कर्नाटकांतल्या दियोसिजींनी एक इतिहास घडयलो. फादर ऑल्वीन हाणीं हाचे आदीं बेळगांव दियोसीज बोर्ड ऑफ एज्युकेशन ॲण्ड सोशल वेल्फेअरचे सेक्रेटरी म्हूण वावर केला. सद्या ते हुबळी-धारवाड डीनरीचे डीन आनी इन्फंट जीझस चर्च, हुबळीचे पॅरीश प्रिश्ट म्हूण वावर करतात.

‘Analytical Study of Karnataka Regional Commission for education- A case study of Belgaum Diocese of Board of Education” ह्या विशयाचेर फादर ऑल्वीन हाणीं पी.एच.डी. मेळयल्या. अशे तरेची आपल्याच दियोसिजीचेर डॉक्टरेट मेळोवपी सबंद देशांतले ते पयलेच पाद्री आसतले.

फा. ऑल्वीन सुधीर हांची थोडी वळख :

आदरणीय फादर ऑल्वीनचो जल्म 13 डिसेंबर 1975 दिसा हासन जिल्ह्यांतल्या हासन तालुक्याच्या गडेनहळ्ळी हांगा जालो. फादर ऑल्वीन म्हळ्यार निवृत्त शिक्षक मास्टर चौरप्पा आनी अन्नम्मा हांचे तिसरें भुरगें. बापूय शाळेच्या काळासावन खूब बुदवंत आशिल्लो आनी शाळेंतल्या सगळ्या कार्यावळींनी उमेदीन वांटो घेतालो. गडेनहळ्ळींतल्या बेथानी लोयोला शाळेंत शिकपी फादर एक हुशार भुरगो म्हूण सगळ्यांमदें परिचीत आसलो. एस.एस.एल.सींत आसताना ताची शाळेचो जनरल सेक्रेटरी म्हूण निवड जाल्ली. बेथानी इन्स्टिट्यूटच्या सिस्टर ज्युलियेट हिणें ऑल्वीनाक बेळगांव डायोसीजींत वचून थंयसर पाद्री जावपाचो सल्लो दिलो. खरे तर ताणें दोतोर वो अभियंतो जावंचे अशी ताचे बापायची इत्सा आसली. पूण ऑल्वीनान आपल्या बापायक आपणी पाद्री जावपाचो दृढ निचेव केल्याचे सांगले. अशे तरेन ताचो बेळगांव दियोसिजीच्या सांत मायकल सेमिनरींत दाखलो जालो. थंय ताणें जायत्या पाद्रींच्या मार्गदर्शनाखाल व्हड आवडीन शिक्षण घेतलें, आनी फुडें मंगळुरांतल्या सांत जोसेफ सेमिनारींत दाखलो घेतलो. ह्याच दरम्यान पाद्रीपणाच्या शिकपा वेळार थिऑलॉजी विशयांत ताणीं 92.40% मार्क्स घेवन देसांतल्या 34 दियोसिजींतल्या आनी स काँग्रेगेशनांतल्या सगळ्यां विद्यार्थ्यांमदें पयलो नंबर मेळयिल्लो. पाद्रीपणाचें प्रशिक्षण पुराय केल्या उपरांत ताका 4 मे 2004 दिसा तेन्नाचो बिशप आनी बेंगळुरचो निवृत्त आर्चबिशप मोस्ट रेव्ह. बर्नार्ड मोरास हाणीं ताका पाद्रीपणाची ओड्द दिली.

पाद्री म्हूण वावर :

फादर ऑल्वीनान पाद्रीपणाची सुरवात हुबळीच्या केशवापूर हांगाच्या सांत जोसेफ इगर्जींंत सहाय्यक पाद्री म्हणून केली. त्या दोन वर्सांच्या सेवेंत तांणी तरणाट्यांक, जाण्ट्यांक आनी बायलांक धर्मसभेच्या कार्यावळींनी वांटो घेवपाची प्रेरणा दिली. तांची दोन वर्सांची कारकिर्द हुबळीचे भावार्ती अजून विसरूंक नांत. आयज लेगीत संत जोसेफाच्या श्रायनांत ताणें जायत्या आध्यात्मिक कार्यावळींक मार्गदर्शन केल्लें, हें भावार्त्यांक याद आसा.

मुळावो कन्नड पूण कोंकणी भास आत्मसात केल्लो ‘ आमचो पाद्री ‘

हुबळी उपरांत बेळगांव जिल्ह्यांतल्या खानापुर तालुक्यांतल्या बिडी हांगाच्या सांत सेबेस्टियन इगर्जीचो पॅरीश प्रिश्ट म्हूण ताची नेमणूक जाली. आपली आवयभास कन्नड आसतना लेगीत थंयसर ताणें कोंकणी भास शिकून लोकांची धर्मीक आनी आध्यात्मिक गरज भागयली. तेच भाशेन पोरण्या इगर्जीच्या सुवातीचेर एक सोबीत नवीं इगर्ज उभारली. ताचे सगळ्या भावार्त्यांकडेन इतले जिव्हाळ्याचे संबंद आसले की लोक व्हड आत्मीयतेन म आमचो पाद्रीफ म्हूण याद करतात. बिडीचे क्रिस्तांव खूब मोगाळ आनी उर्बेवंत. बरी सेवा करपी सगळ्यांकडेन ते आपली इश्टागत जोडटात. आयज लेगीत ते म्हजो तितलोच मोग करतात जितलो ते हांव थंय पॅरीश प्रिश्ट म्हूण आसताना करताले, अशें फादर ऑल्वीन हाणीं भावुकतेन सांगले. हाचे वांगडाच ताणें बिडीचे सबस्टेशन आशिल्ल््या कित्तूर हांगाच्या डायोसिजीच्या जमनी खातीर संघर्श केलो. कित्तुरांत 1845 वर्साथावन अर्थात राणी कित्तूर चन्नम्माच्या राजवटीदरम्यान इगर्ज आसली. ही जमीन परती डायोसिजीच्या नावान केली. त्या उपरांत बिशप पीटर मच्याडो हांचे मार्गदर्शनाखाल ताणे एक बरी सुसज्ज अशी शाळा उगडली. ताचे प्रतिभेक वळखून बिशप मच्याडोन ताची बिशप्स हावसांत डायोसिजच्या शिक्षण बोर्डाचो उपसचीव म्हूण नेमणूक केली. आनी बिस्पाच्या सल्ल्यान ताणे पीजीसीईटी बरयली आनी ताका व्हीटीयु विद्यापिठांत एम.बी.ए. त दाखलो मेळ्ळो. अशे तरेन फादर ऑल्वीनान एमबीए यशस्वीपणान पुराय केली. त्या उपरांत धर्मक्षेत्राचो ट्रेझरर आनी बीडीबीई ॲण्ड एसडब्ल्यूचो सचीव म्हणून ताची नेमणूक जाली. त्या काळांत ताणें केल्लीं कामां अविस्मरणीय आसात.

डायोसिजीच्या शिक्षणीक क्षेत्रांत मोलादिक योगदान :

डायोसिजन शैक्षणिक आनी सामाजिक सेवा क्षेत्राचो सचीव म्हूण बिशप मच्याडो हांचे मार्गदर्शनाखाल तांणी डायोसिजींत 21 नवी हायस्कुला सुरू केली, तेच भाशेन डियोसिजींतले एकमेव अशे बी.एड. कॉलेज सुरु केले. ह्याच दरम्यान स्कूल बसेस सुद्धा सुरु केल्यो. नवी स्कुला सुरु करप, इगर्जींखातीर जमीन खरेदी करप हातूंत ताणे सपाटो लायलो. बेळगुंदीचे सेंट पॉल्स हायस्कूलची नवी इमारत बांदपांत तांचो मोलादिक वांटो आसा.

ह्याच दरम्यान सगळ्या शिक्षण संस्थेच्या सगल्या शिक्षकांक एकठांय हाडून तांच्यो कागाळी आयकून त्यो निवारण करपाचो वावर लेगीत ताणीं केलो. ते भायर शिक्षण वेवस्थेंत शिक्षकांक जाय आशिल्ली कुशळटाय वाडोवपा खातीर दर वर्सा डायोसिजींतल्या वेगवेगळ्या शाळांनी शिक्षक समृध्दी कार्यावळी ते घडोवन हाडटाले. 2018 इस्वेंत बीडीबीईचो भांगरा महोत्सव बेळगांवच्या सेंट झेवियर शाळेंत फादर ऑल्वीन हांच्या फुडारपणा खाला आनी डायोसिजीचे तेन्नाचे प्रशासक फादर युसेबियो फर्नांडीस हांच्या मार्गदर्शनाखाल भव्य रितीन मनयलो. ह्या कार्यक्रमांत आपले मंत्रीमंडळ आनी जायते आमदार हांचे वांगडा राज्याचे मुख्यमंत्री आशिल्ले. मानादीक श्री. कुमारस्वामी हांणीय वांटो घेतलो. फादर ऑल्वीन हाच्या वेवस्थापनांत हो कार्यक्रम खूब यशस्वी जालो. बीडीबीईन ताच्या काळांत जायत्यो उदरगतीच्यो घडामोडी पळयल्यात.

ह्याच दरम्यान फादरान एमकॉम, एम.ए.(अर्थशास्त्र) आनी एम. एड. पदव्यो पुराय केल्यो. पूण शिक्षणाची तान सोंपली ना आनी ताका शिक्षणाच्या मळार संशोधन करपाची इत्सा जाली. ते प्रमाण डॉ. विश्वेश्वरय्या तांंत्रीक विद्यापीठाची भोवमानाची डॉक्टरेट तांका 01.08.2023 दिसा फावो जाली.

सद्या इन्फंट जीझस पॅरीश, हुबळीचे पॅरीश प्रिश्ट म्हूण फादर ऑल्वीन हाणीं इगर्जीचो कॅम्पस खूब सोबीत केला. तेच भाशेन ह्या इगर्जीचे नुतनीकरन करून तिका एका तीर्थस्थानाचो दर्जो मेळयचे दिश्टीन तांचे प्रयत्न सुरु आसात. आपल्या सेवे वोरवीं फादर ऑल्वीन गरिबी उणी करप, भलायकी आनी कुटुंब कल्याण, शिक्षण आनी आध्यात्मिक वाड हांकां प्राधान्य दिवन आपल्या पॅरीशच्या उदरगती खातीर वावरता. फाटलीं चार वर्सां ताणीं दियोसिजींतल्या वेगवेगळ्या पदांचेर सहगुरू, उपसचिव, सचीव, कोशाध्यक्ष, सल्लागार, पाद्री मंडळाचो वांगडी म्हूण वावर केला. बेंगळुरूचो भोवमानेस्त आर्चबिशप पीटर मच्याडो, बिशप डेरिक फर्नांडीस, आदले आर्चबिशप रेव्ह. बर्नार्ड मोरास, पाद्री, सिस्टर्स, कुटमाचे वांगडी आनी क्रिस्तांव भावार्ती आनी हेर जायते लोक मार्गदर्शन आनी मजत विसरूंक नात. अशे तरेन हेर धर्मांतल्या लोकांक एकठांय हाडून तांकां आदार आनी मजत करून  फकत पन्नास वर्सां पिरायेचेर ताणीं आपल्या जिवीतांत एक भव्य अशी उंचाय गाठल्या. फादराक देवान बरी भलायकी दिवंची आनी ताचें जिवीत समादानाचे करचे, अशी आस्त बाळगता.

– विल्सन फर्नांडीस (सर), सेंट मेरीज हायस्कूल, केशवापूर, हुबळी

Related Posts

POPULAR NEWS

EDITOR'S PICK