
बेंगळुरू: ज्येष्ठ पत्रकार, सामाजिक वावराडी आनी उजवाडचे संपादक लुईस रॉड्रीग्स हांची कर्नाटक राज्य अल्पसंख्याक आयोगाच्या प्रधानमंत्री 15 पॉइंट्स कार्यावळीच्या बेळगाव जिल्हो अंमलबजावणी समितीवयर नेमणुक जाल्या. कर्नाटक सरकार आनी राज्यपालांच्या आदेशाप्रमाण अल्पसंख्याक कल्याण, हज आनी वक्फ खात्याचे कर्नाटकाचे अवर सचिव एस. एजाज पाशा हांणी तसो आदेश काडला जाची प्रत लुईस रॉड्रीग्स हांका धाडल्या.
लुईस रॉड्रीग्स हे सध्या दि गोवन, गोवन वार्ता आनी भांगरभूंय दिसाळी तशेच प्रुडंट टी.व्ही. चे उत्तर कर्नाटक ब्युरो चीफ म्हूण फाटल्या 10 वर्सांथावन वावुरतात. घाटमाथ्यावयली कोंकणी भास आनी संस्कृताय हाचेर केंद्र सरकारच्या सांस्कृतिक मंत्रालयाची दोन वर्सांची फेलोशीप तांणी यशस्वी रितीन पुराय केल्या. तेच भाशेन कोंकणी भास आनी संस्कृताय हांचे संवर्धनापासत ताणीं केल्ल्या वावरा खातीर तांकां कर्नाटक आनी गोंय सरकार तेच भाशेन वेगवेगळ्या संघसंस्थांनी पुरस्कृत केला.
सामाजिक वावरांत लेगीत तांचे योगदान खूब मोलादिक आसा. बेळगांव दियोसिजीचे मानद पब्लीक रिलेशन सेक्रेटरी म्हूण फाटली 15 वयर वर्सा ते वावुरतात आनी ह्या मळार खूब मोलादिक वावर करतात. अखिल भारतीय कोंकणी परिषदेच्या कार्यकारी समितीचे वांगडी तसेच केंद्रीय साहित्य अकादेमी, नवी दिल्लीच्या कोंकणी सल्लागार मंडळाचे वावराडी म्हूण लेगीत ताणी पांच वर्सा वावर केला. कोंकणी भास आनी संस्कृताय थिगोवन दवरुंक तांची तळमळ आनी योगदान मोलादिक आसा. तांच्या जनसंपर्काचे आधाराचेर बेंगळूरच्या गार्डियन सहकारी बँकेचे मेंटर आनी सल्लागार म्हूण तांची नेमणूक जाल्या.
एक धडाडीचे पत्रकार, नामणेचे संपादक आनी तळमळीचे सामाजिक वावराडी आनी कोंकणी कार्यकर्तो म्हूण लुईस रॉड्रीग्स हांची जनसामान्यामदें बरी प्रतिमा आसा. बेळगावचे गवळीबाप डॉ डेरिक फर्नांडीस हाणीं तांचे अभिनंदन केला. लुईसबाब हांच्या निवडीवोरवीं बेळगांव जिल्ह्यांतल्या क्रिस्तांव आनी अल्पसंख्याक समाजाच्या उदरगती खातीर चालना मेळटली हातूंत दुबाव ना.
लुईस रॉड्रिग्स हांच्या शासकीय थरावयल्या ह्या निवडीखातीर तांचे सगळ्या थरांतल्यान अभिनंदन जायत आसा.
– मिनीन गोन्साल्वीस
News Views: 637








