उजवाड ब्युरो, बेळगाव: उजवाडची स्थापना जाल्याथावन ते आयजमेरेन ज्या कांय मानेस्तांचो उजवाडचे वाटचालींत मोलादिक वांटो आसा, तातूंत आल्फी मंतेरो हांचो मोलादिक वांटो आसा. विचार, आचार आनी आहार अशा तिनुय गजालींनी जांचे व्यक्तिमत्वांक सात्विकतायेची झालर लाभल्या, ते आमचे शिस्तप्रीय आल्फी अंकल म्हळ्यार समाजाक मेळिल्ले एक मोलादिक देणे आसा. एक निष्णांत इंजिनियर, नितीमत्तेन वेवसाय करपी यशस्वी उद्योजक आनी निसुवार्थ पणान वावर करपी सामाजिक कार्यकर्तो अशी वळख आशिल्ल्या आल्फी अंकल हांचे ऑलरावन्ड व्यक्तिमत्वाची एक म्हत्वाची बाजू म्हळ्यार तांच्या मदलो लेखक व्हय.
एक लेखक म्हणून तांचे उजवाडाक मेळिल्ले योगदान जितले मोलादिक आसा, तितलोच उजवाडाक ताणी दिल्लो आधार लेगीत खूब भरीव आसा. आल्फी अंकलान उजवाड चलोवंक लागपी जायरात रुपी उर्जा दिवन ताणीं उजवाडची ही ज्योत तेवत दवरूंक फाटल्या 25 वयर वर्सांथावन मोलादिक वावर केला. आनी म्हणूनच उजवाड चलोवप शक्य जाले. आल्फी अंकल म्हळ्यार माहितीचो आनी गिन्यानाचो स्त्रोत आसा. वाचपाचो तांचो व्यासंग दांडगो आसा, तेच परी आपल्या अभ्यासू सभावा वोरवी तांकां बरोवंचे देणे मेळ्ळा. घाटमाथो प्रदेशांतल्या क्रिस्तावांचेर तांणी खूब कश्टान आनी खोलायेन 10 वयर वर्सां संशोधन करून ‘बारदेस्कर्स – दि मिस्टरी ऑफ मायग्रेशन’ हे बहुमुल्य पुस्तक उजवाडाक हाडला. ह्या इंग्लीश पुस्तकाचो कोंकणी भाशेंत अणकार सुरु आसा आनी रोकडेच हे पुस्तक आता आमकां आमच्या अर्थात बारदेस्करांच्या कोंकणी भाशेंत उपलब्ध जातेले. ह्या संशोधना वोरवीं आमचे दायज, भास आनी पुर्वजांचो इतिहास आता अजरामर जाल्यात. आमचो मोगाळ आल्फी अंकल आता आपल्या जिवीताचो अमृतमहोत्सवी वाढदीस मनयता. ताका साबार वर्सांचे जिवीत मेळचे म्हूण समेस्त उजवाड परिवारा वोरवीं मागता. – लुईस रॉड्रीग्स










