सोडून आमकां दुख्खांत… नेल्सन पावलो देवाच्या बागेंत

वाटंगी गावांतलो उमेदवंत आनी धडाडीचो तरणाटो नेल्सन आल्बर्ट डिसोझा देवाधीन जाल्ल्याक आयज 7 दीस पुराय जातात. पूण काळजाचो ठाव घेवपी ही घटना आनी सगळ्यांक बशिल्ल्या धक्क्यांतल्यान नेल्सनची फामील आनी चडकरून ताचे इश्ट-सोयरें, हांगाचो समाज तशेच आलबर्ट डिसोझा फामिलीचे हजारांनी हितचिंतक अजून लेगीत भायर आयले नांत. मंद स्मीत मुखामळार घेवन समाजात सगळ्यांकडेन आदरान-मोगान जियेवपी नेल्सन अजून लेगीत आमच्या सगळ्यांच्या काळजा-मनांत अगदी जसोच्या तसो जियेता… अगदी हसतमुखान..

9 मे दिसा वाटंगी गांवचो पात्रोण सांत सेबेस्तियांवाचे फेस्त दबाजान मनोवन इल्लेशे सुशेगात जाल्ल्या मानेस्त आल्बर्ट आनी कॅरोलीन डिसोझा आनी फामिलीच्या जिवीतांत फेस्ता उपरांत दोनच दिसांत हो एक व्हड आघात जालो. वायटांतल्या वायट सपनांत लेगीत कोणीय चितुंक नासतले ते अघटीत घडलें. तांचो लाडको पूत नेल्सन कोणाच्याच.. कदाचीत नियतीच्याय धेनामनांत नसताना मंगळार, 12 मे दिसा देवाधीन जालो. नेमकें कितें जाला हे समजायच्या आदीच काळान आपलो घालो घाल्लो आनी सगळ्यांच्या नुदरे सामकारल्यान  … अगदी दोळ्यांदेखत नियतीन नेल्सनाक आमचेमदल्यान व्हेलो.. अगदी सदाचोच !! फामिलींत आनी समाजांत सगळ्यांच्या काळजा मनांनी खुशालकाय हाडपी नेल्सन बाळ सगळ्यांक दुख्खाच्या खाईंत सोडून पावलो सरळ देवाच्या बागेंत…धावत धावत… ताची बाग फुलोवंक आनी थयसर पावलेल्या सगळ्यांक खुशालकाय हाडुंक !!

आल्बर्ट डिसोझा म्हळ्यार सगळ्या पंचक्रोशींतलो ’साहेब’ .आमच्या सगळ्यांचो इर्माव. भारदस्त आनी उंचेल्या व्यक्तिमत्वाक तितल्याच भारदस्त आवाजाची आनी कर्तुत्वाची साथ मेळिल्लो ’साहेब’ आपल्या कर्तुबावोरवीं आनी तडफदार वावरा वोरवीं वाटंगीकर आनी तालुक्यांतल्या सर्वधर्मीय समाजाच्या काळजांनी स्थान निर्माण केल्लो मळबाइतलो उंच फुडारी. तालुकाच्यो सभापती म्हूण ताणे केल्लो वावर मोलादिक. तालुकास्तरीय संघ-संस्थांचो चेअरमन- संचालक.  बँकींग क्षेत्रांत चडकरून सहकारी क्षेत्रांत जयसर सगळेकडेन निराशेच वातावरण आसा, हाका अपवाद आशिल्ली आनी खूब जोमान सुरु आसलेली सन्मित्र पतसंस्था, रवळनाथ दूदसंस्था, वाटंगी हायस्कूल ह्यो संस्था खूब जिद्दीन आनी कौशल्यान सांबाळपी संस्थापक चेअरमन. वाटंगीच्या रोझरी इंग्लीश स्कुलाच्या जडणघडणीत लेगीत ताचो मोलाचो वांटो. तीन धुवांच्या उपरांत पोटाक आयिल्लो ताचो पूत नेल्सन लेगीत सगळ्यांचो लाडको. एक यशस्वी कबडीपटु आनी खेळगडी. प्रभावी व्यक्तिमत्व लाभिल्लो नेल्सनबाळ जितलो मितभाशी, मृदु तितलोच कर्तुबी आनी समंजस ! आपली नोकरी संबाळून आपल्या फामिलीक आधार दिता आसतना कसलोच गाजावाजा करी नासताना सामाजिक वावरांत हातभार लायतालो. ताच्या सर्गींच्या आपोवण्याच्या आदी दोन दीस म्हळ्यार फेस्ता दिसा तो खूब जोमान वावुरतालो.

एका यशस्वी घराण्यांतलो आनी कर्तुबी समाजांतलो अनभिषिक्त राजबिंडो राजकुंवर तो. सोज्वळ मनाचो.. निर्मळ काळजाचो निरागस तरणाटो. अगदी हसत हसत आनी भयणींकडेन मिश्किलपणान उलयत ऑपरेशन थियेटरांत वयता कितें आनी कांय खिणांभितर तो एकदम निपचीत जाता किते !! सगळेच अनाकलनीय आनी कल्पनेच्या पलतडले ! नेल्सनचे अकाली देवाधीन जावप हाच्या फाटी कितेय कारण आसूं, पूण नियतीचो हो क्रूर खेळ अगदी अमान्य !! ताच्या मरणाची खबर आयकलेल्या प्रत्येकाची काळजा मना अगदी सुन्न जाल्ली. ‘अरे,आमच्या नेल्सन सांगात हे अशे जालेच कशें?’ होच सगळ्यांच्या काळजांतलो प्रस्न अजून अनुत्तरीतच आसा…

इंतेराक सगळे आमदार, नामदार हांचे सांगाता सबंद घाटमाथो प्रदेशांतल्यान फकत क्रिस्तांवच न्हय तर हेर धर्माचो आस्पाव आशिल्लो जूसमुदाय उसळ्ळो, जिवीताच्या सुरवातीकच आपलो डाव आटपतो घेतिल्ल्या आपल्या ह्या लाडक्या बाळाक सर्वेश्पराच्या स्वाधीन करुंक, ताका निमणो आदेवस दिवंक !!

सगळ्यांची काळजां-मना हळहळताली. चेन्नाइथावन आयलेल्या ताच्या इश्टांनी तर अगदी हंबरडोच फोडलो आपल्या इश्टाच्या आानक वचण्यान ते सगळेच ओक्साबोक्सी रडटाले. काजारी जिवीताचो फकत एकच वर्स सांगात लाभिल्ली  प्रियांका ताची घरकान्न तर ताचे कुडीचेर हात दवरून सुन्ना जावन बशिल्ली. ‘ कितें जातेले ह्या पोरीचे‘ अगदी सगळ्यांच्याच मनांत हळहळ !! मोगाळ आलबर्ट इर्माव आनी कॅरोलीन बाय आनी ताच्यो भयणी आनी कुंज्यात सगळेच  सुन्न जाल्ले. पूण दुख्खाचो दोंगर कोसळून लेगीत ह्या वेळार आल्बर्ट इर्मावचो धिरोदात्तपणा आनी खंबीरताय वाखाण्णी करपा सारको आसलो. आपलो पूत गेल्याचे दुख्ख मनांत गिळून तो सगळ्यांक धीर दितालो. एक धीराचो दादलो आनी खरो फुडारी.

ह्या घटनेंतल्यान सावरप तितलें सोप्पे ना. नेल्सनच्या फामिली सांगाताच आमचीय काळजां धाय मोकलून रडटात. पूण इतल्या दुख्खात आसतना लेगीत आपल्या ऋणनिर्देश संदेशात आल्बर्ट इर्मावान आमकां  ’ शेवटचो श्वास आसा तो मेरेन आपण समाजा खातीर कार्यरत रावतलो ’  अशी भास दिल्या.

धन्य तो नेल्सन… धन्य ताची फामील. सासणाचो विशेव नेल्सनच्या आत्म्याक मेळुं आनी ताच्या फामिलीच्या दुखी काळजांचेर फुंकर घालून देवान तांच्यो वेदना इल्ल्यो उण्यो करच्यो म्हूण मागताव.

–  लुईस रॉड्रीग्स

Related Posts

POPULAR NEWS

EDITOR'S PICK