तुमचे भुरगेपणाचो पुराय आनंद घेयात : सेंट पॉल्स आयोजीत क्रोनोस व्ही10 कार्यावळींत पोलीस उपआयुक्त रोहन जगदीश

उजवाड ब्युरो, बेळगांव : कितेंय साध्य करपा खातीर भुरगेपणा थावनच चड ताण घेवचो न्हय तर भुरगेपणाचो चडांत चड आनंद घेवचो असो उलो बेळगावचे पुलीस उपआयुक्त रोहन जगदीश हांणी केला. इंटरस्कूल आनी कॉलेजींतल्या पांवड्यावेल्या कला, सांस्कृतीक आनी साहित्यीक सर्तीच्या क्रोनोस व्ही 10 च्या उक्तावण सुवाळ्यांत ते उलयताले. सेंट पॉल्स हायस्कुल आनी जूनियर कॉलेजीन सेंट पॉल्स हायस्कुल कॅम्पसांत आयोजीत केल्ल्या ह्या दोन दिसांच्या महोत्सवांत भुरग्यां खातीर आनी तरणाट्यां खातीर सुमार 15 शाळा आनी कांय कनिश्ट म्हाविद्यालयां हांचे मदें स्पर्धा आसतेली.

आमच्या काळाचे शिक्षक आयच्या परस सामके वेगळे आशिल्ले. ते काळांत म्हाका सगळ्यांकच मान दिवपाक म्हाका शिकयिल्ले.  तुमी फाल्यांचे नेखेत्रां आसात. हांव एक सामान्य विद्यार्थी आशिल्लो. विद्यार्थी म्हूण आमी सदांच दर एका दिसा दरेक गजालीची अचीवमेंट करपाक दबावा खाला रावचें पडटा. There is no hurry in achieving something, but donot forget that we will never get back the childhood, hence enjoy your childhood to its fullest. कित्याक आमी जशे आमी व्हड जातात तशें आमकां अधिक कश्ट करचे पडटात आनी कश्ट करून जिणेंत कितें तरी साध्य करचें पडटा, डीसीपी रोहन जगदीशान म्हळें.

अनवेलिंग अर्थस इवोल्यूशन  ह्या कार्यक्रमाच्या थीमचेर भर दितना सेंट पॉल्स हायस्कुलाचे प्राचार्य फादर सायमन फर्नांडीस हांणी सांगलें की मनीस वानरांतल्यान उत्क्रांत जाला अशें म्हणटात. आतां मनीस पुरायपणान विकसीत जाला तेन्ना अधिकाधीक भागेवंत जावन मनशान आतां अधिक विकसीत जाताना नराचो नारायण जावप आनी अधिक शुद्ध जावप गरजेचे आसा अशें फादर सायमन हांणी सांगलें.

सुरवेक सेंट पॉल हायस्कुलाच्या विद्यार्थ्यांनी प्रार्थना गीत सादर केलें. सेंट जोसेफस कॉन्व्हेंटाची वेवस्थापक सिस्टर नतालिया डीमेलो, सेंट पॉल जुनियर कॉलेजीची प्राचार्य फादर स्टीवन आल्मेडा, व्हाईस प्रिन्सिपल फादर आलेंद्रो दा कोस्टा, वरिश्ठ पत्रकार लुईस रॉड्रिगीस हजर आसले. ह्या वेळार विद्यार्थ्यांनीनी एक शास्त्रीय नाच सादर केलो. वेगवेगळ्या शाळांचे कर्मचारी आनी पालक हाजीर आशिल्ले.

दोन दिसांचे ह्या कार्यावळींत नाच, गायन, छायाचित्रण, तंत्रगिन्यान फेस्ट, वादविवाद, फॅशन शो,वक्त्रुत्व स्पर्धा , कला, स्पेल बी आदी सर्ती जातेल्यो. पुलीस आयुक्त इआडा मार्टीन मारबानियांग ह्या कार्यावळी खातीर मुखेल सोयरो आसतलो आनी तशेंच इनामां दितले शेनवारा सांजवेळार सेंट पॉल्स हायस्कुलाच्या मैदानाचेर ही कार्यावळ जातेली.

Related Posts

POPULAR NEWS

EDITOR'S PICK