उजवाड ब्युरो, बेळगाव : मुळावे, उकासाई, ता. बार्देश, गोंय हांगाचे आनी कांय वर्सा आपले प्राथमिक शिकप प्राथमिक शिक्षण गडहिंग्लज हांगा करून फुडें कोल्हापूर हांगा एलएलबी करून ॲडव्होकेट जावन कोल्हापूर जिल्ह्याच्या सहकारी मळार फामाद आशिल्ले ॲड संजय फ्रान्सीस डिकुझ हांची मंगळारा कोल्हापूर जिल्हा को ऑप. बार असोसियेशनाच्या अध्यक्षपदाचेर निवड जाली. हांगाच्या कोऑपरेटिव्ह कोर्टाच्या बार रुमांत जाल्ल्या वेंचणुकींत ॲड डिक्रुझ हांची ही निवड एकमतान जाली. फकत 51 वर्सां पिरायेच्या ह्या कोंकणी सुपुतान इतलो व्हडलो भोवमान मेळयला ताचे खातीर कोल्हापूर जिल्ह्यांतल्या सबंद क्रिस्तावांक आनी विशेश करून कोंकणी मनशाक अभिमान दिसता.
कोल्हापूर जिल्हो म्हळ्यार मराठा समाजाचे प्रबळ अस्तीत्व आशिल्लो जिल्हो आशिल्ल्यान थंयसर अल्पसंख्यांक समाज, चड करून क्रिस्तावांक अशी संद मेळप खूब दुरापास्त आसा. तरी आसतना जिल्ह्यात बरो वावर करून नावारुपाक आयिल्ल्या ॲड डिक्रूझ हाणीं आपल्या 25 वर्सांच्या कारकिर्दीत खूब बरे नाव जोडल्या. तेच भाशेन फाटल्या 25 वर्सांथावन तांची जिल्ह्यात वकिली प्रॅक्टीस चलता.
कोल्हापूर जिल्ह्यांतल्या जायत्या सहकारी बँकांचे ते कायदेविशयक सल्लागार म्हूण वावर करतात. कोल्हापूर जिल्हा मध्यवर्ती बँक (केडीसीसी)चेर लेगीत ताणीं लीगल ॲडव्हायजर म्हूण आनी वेगवेगळ्या संस्थांचेर ते पदाधिकारी म्हूण वावरतात. उजवाड खातीर ते नेमान बरोवप करतात, तांचे ब्लॉग्स लेगीत खूब लोकप्रीय आसात. तांच्या ह्या निवडी खातीर सगळेकडेन तांचे अभिनंदन जाता. ॲड. डिक्रुझ हे फुडली दोन वर्सा हें अध्यक्षपद सांबाळतलें.
खूब वर्सां आदीं मुळावे गडहिंग्लजचे फामाद वकील ॲड जे जे बारदेस्कर हांची कोल्हापूर जिल्हा बार असोसियेशनचे अध्यक्ष म्हूण निवड जाल्ली. ताचे उपरांत जिल्हा स्थराच्या एका बार असोसियेशनाचेर ॲड संजय डिक्रुझ हांचे रुपान आमकां दुसरो अध्यक्ष मेळ्ळा.










