उजवाड ब्युरो, बेळगाव : संवसारभरांतल्या किरिस्तांवांक शिमितरी वा दफ़नभुंय फकत मेल्लीं कुडीं पुरपाचीं सुवाती न्हय, तर तांकां आपल्या प्रिय व्यक्तींच्या यादीं खातीर पवित्र सुवात मानतात. देखून दर वर्सा किरिस्तांव लोक 2 नोव्हेंबर हो दीस ‘सगल्या आल्मांचो दीस’ म्हूण भावार्थ आनी भक्तीन मनयतात.
बेळगांव शारांतले तसेच हेर सगळ्या गावांतले क्रिस्तांव भाव आयतारा 2 नोव्हेंबराक हो दीस भक्तीन मनयपाक तयार आसात. बेळगावांत क्लब रस्त्या लागसार आशिल्ली ब्रिटीश आनी पोरणी शिमितरी सोडल्यार खानापुर, शाहापूर, काकती, हिंडलगा आनी लागसारच्या गांवांतल्या शिमित्रींनी ह्या दिसाची तयारी सुरू आसा.
फाटल्या पंदरा दिसां सावन खाशेल्यो समिती तयार जावन ह्या पवित्र थळांची नितळसाण, रंगोवप आनी सोबीतकाय करपाचो वावर हातांत घेतला. मसणभुंयेंत आशिल्ल्या सगळ्या फ़ोंडांचेर नंबर घलून रंगयल्यात आनी मेल्ल्या मनशाची म्हायती नोंद करतात.
आयतारा, २ नोव्हेंबराक सांजवेळा सुमार ४ वरांचेर सावन व्हड प्रमाणांत क्रिस्तांव भाव त्या त्या मसणभुंयेंत जमून प्रार्थना सभेंत वांटो घेतले. ह्या वेळार पुजारी पुरपाच्या सुवातींक आशीर्वाद दितले. ही प्रार्थना सेवा तरणाट्यां खातीर आनी जाण्ट्यांक एक आगळोच आध्यात्मिक अणभव जातली अशें मानतात.
बेळगाव शाराच्या वेगवेगळ्या वाठारांतल्यान व्हड प्रमाणांत क्रिस्तांव भाव ह्या धर्मीक कार्यावळींत वांटो घेतले.
……
फोटो: साविओ परेरा










