रेल्वेंत आठ प्रवासी मेळ्ळे बेशुद्ध

उजवाड ब्युरो, पणजी 13 सप्टेंबर : वास्कोच्यान दिल्ली वचपी रेल्वेंत आठ प्रवासी बेसुद्ध मेळ्ळे. गोंयांत काम करपी हे आठ जाण खांडवा मध्यप्रदेशाक वचपाचे आशिल्ले. ही घडणुक 11 सप्टेंबराक घडली. तांकां बेळगावां हॉस्पिटलांत दाखल केल्यात. सात जाण बरे आसात जाल्यार एकल्याची स्थिती गंभीर आसा.
12779 क्रमांकाच्या निजामुद्दीन- गोवा एक्सप्रेसांतल्यान 8 प्रवासी गोंयांतल्यान खांडवाक वचपाक भायर सरले. ते सगळे निमाण्या जनरल डब्यांतल्यान प्रवास करताले. सावड्डें रेल्वे स्टेशना फुडें पावले उपरांत ते सगळे न्हिदिल्ले स्थितीत मेळ्ळे. ते उपरांत रेल्वे सुरक्षा कर्मचाऱ्यांनी तांकां जागे करपाचो यत्न केलो तेन्ना ते जागे जाले नात. उपरांत रोखडीच रेल्वे दोतोरा वांगडा बेळगांव पोस्टाच्या आरपीएफान तांची तपासणी केली. तातूंतले सात जाण सुरक्षीत आशिल्ले जाल्यार एकल्याची स्थिती गंभीर आसा. सगल्यांक हॉस्पिटलांत दाखल केल्यात.
मजगतीं, एका प्रवाशाचे म्हायती प्रमाण रेल्वेंत 25- 30 वर्सां पिरायेचो प्रवासी डब्यांतल्या हेरां कडेन उलयतालो. ताणें कांय प्रवाशांक चॉकलेटी, कुरकुरी अशें खावपाक दिल्ले. घडये ते प्रवासी सावड्डें रेल्वे स्टेशनाचेर देंवले आसूं येता. त्या प्रवाशांनी दिल्ल्या चॉकलेटीक लागून तांका हो त्रास जाला आसूं शकता अशें तांणे सांगलें. रेल्वे पुलीस हे घडणुकेची चवकशी करतात.

 

Related Posts

POPULAR NEWS

EDITOR'S PICK